- वि.सं २o७७ फाल्गुण १३ बिहीबार
जग्गाको माग गर्दै कर्णाली प्रदेश मुख्यमन्त्री तथा मन्त्रिपरिषद् कार्यालयको चौरमा धर्ना बसेका बादी समुदायका बालबालिका तथा वृद्धवृद्धा बिरामी पर्न थालेका छन् । खालीचौरमा चार दिनदेखि दिनरात धर्नामा बसेका उनीहरू बिरामी पर्न थालेका हुन् ।
बालबालिका र वृद्धवृद्धामा रुघाखोकी तथा ज्वरोको समस्या देखिएको संघर्ष समिति दैलेखका अध्यक्ष प्रेम बादीले बताए । ‘दिउँसोको चर्काे घाम र रातिको चिसोको कारणले पनि होला रुघाखोकी र ज्वरोका बिरामी बढेका छन्,’ उनले भने, ‘राम्रोसँग खान नपाउँदा पनि समस्या भएको छ ।’
बिरामी परेका बादी समुदायका केहीको प्रदेश अस्पतालमा उपचार भइरहेको उनले जानकारी दिए । लालपुर्जासहितको खेतीयोग्य जमिन, घर र रोजगारी दिनुपर्ने माग राख्दै दैलेख र कालिकोटका बादीहरू मुख्यमन्त्री कार्यालयअगाडिको खुला चौरमा बस्दै आएका छन् ।
