- वि.सं २o७७ फाल्गुण ४ मंगलबार
स्वास्थ्य तथा जनसंख्या मन्त्रालय सिंहदरबारभित्र सर्ने भएको छ । नागरिकको भिड बढ्दै जाँदा दैनिक कामकाजमा समस्या हुन थालेपछि स्वास्थ्य मन्त्रालयलाई सिंहदरबारभित्र सार्न लागिएको हो ।
प्रधानमन्त्री केपी ओलीले स्वास्थ्य मन्त्रालय सिंहदरबारभित्र सार्ने विषयमा निर्णय लिइसकेको प्रधानमन्त्री कार्यालय स्रोतको भनाइ छ । ‘प्रधानमन्त्री कार्यालयनिकट स्रोतले भन्यो, ‘स्वास्थ्य मन्त्रालय मात्रै बाहिर छ । त्यसलाई पनि भित्र ल्याउने विषयमा प्रधानमन्त्री लाग्नुभएको छ । उहाँ आफैँले स्वास्थ्य मन्त्रालयका उच्च अधिकारीहरूसँग सिंहदरबारभित्र आउने विषयमा जानकारी लिनुभएको छ ।’
मितिको टुंगाे नलागे पनि केही महिनाभित्र सर्ने निश्चित भएको स्वास्थ्य मन्त्रालयका अधिकारीहरूले पनि बताए । मन्त्रालयका अधिकारीहरूले यसअघि पनि स्वास्थ्य मन्त्रालयलाई सिंहदरबारभित्र लान आग्रह गर्दै आएका थिए ।
पुरानो प्रधानमन्त्री कार्यालयको पुनर्निर्माण सकिएकाले प्रधानमन्त्री ओली पुरानै भवनमा सरेका छन् । सिंहदरबारभित्र हाल एउटा भवन खाली छ । मन्त्रालय सिंहदरबारभित्र गएपछि विभाग भने हाल मन्त्रालय भएको भवनमा आउनेछ ।
