- वि.सं २o७७ माघ १३ मंगलबार
तिला गाउँपालिका– ७ गोठीगाउँमा आगलागी हुँदा ५५ मध्ये ३० घर जलेर नष्ट भएका छन् । जिल्ला प्रहरी कार्यालय जुम्लाले आगलागीबाट ३० घर जलेर नष्ट भएको बताएको छ ।
डिएसपी माधवप्रसाद काफ्लेका अनुसार अहिले पनि आगो नियन्त्रणमा आउन सकेको छैन । उनले भने, ‘आगलागी भएको जानकारी प्राप्त हुनासाथ नेपाल प्रहरी, सशस्त्र प्रहरी र नेपाली सेनाको टोली घटनास्थलतर्फ गएका छन् ।’
सदरमुकामबाट गाडीमा ४५ मिनेटमा गाउँपालिका केन्द्र पुगिने र त्यहाँबाट तीन घन्टा हिँडेर आगलागी भएको गाउँसम्म पुग्न सकिने प्रहरीले जनाएको छ । काफ्लेले भने, ‘हामीले जिल्लाबाट टोली पठाएका छौँ । तीनवटै सुरक्षा निकायका टोली त्यसतर्फ प्रस्थान गरिसकेका छन् । स्थानीयले आगो निभाउने प्रयास गरिरहेका छन् । त्यहाँ पानीको पनि उपलब्धता नभएकाले आगो नियन्त्रणमा ल्याउन समस्या भएको बुझिएको छ ।’
आगलागीको कारण हालसम्म खुलेको छैन ।
