- वि.सं २०८१ बैशाख १३ बिहीबार
कांग्रेस सभापति शेरबहादुर देउवाले नेता रामचन्द्र पौडेललाई पार्टीभित्रका विवादका विषयमा लचिलो भइदिन आग्रह गरेका छन् । सोमबार अपराह्न पौडेलनिवास बोहराटार पुगेका देउवा करिब डेढ घन्टापछि बाहिरिएका थिए ।
समसामयिक राजनीतिक सन्दर्भ र पार्टीको आन्तरिक राजनीतिक विषयमा भएको छलफलमा देउवाले पार्टीभित्रका आन्तरिक विवादका विषयमा सहमतिको प्रस्ताव गरेका हुन् । देउवाले पार्टीको १४औँ महाधिवेशन धेरै ढिला गर्न नहुने भन्दै विवाद समाधानका लागि लचिलो भइदिन आग्रह गरेका छन् ।
भेटमा पार्टीका क्रियाशील सदस्यमाथिको विवाद छानबिन गर्ने समितिका संयोजक रमेश लेखकलाई समर्थन गर्न पनि देउवाले आग्रह गरेका छन् । ‘समसामयिक राजनीतिक विषयहरूमा छलफल भयो, पार्टीको आन्तरिक विवादलाई टुंग्याएर महाधिवेशनको तयारीमा लाग्नुपर्ने विषयमा समेत छलफल भयो, तर ठोस सहमति भएन,’ पौडेलको सचिवालयले भन्यो ।
