प्रधानमन्त्री केपी ओलीले राष्ट्रिय सभा बैठकलाई सम्बोधन गरेका छन् । उनले आफ्नो कदमको बचाऊ गर्दै सधैँ जालझेल र तिकडमकाे राजनीतिले सरकारलाई काम गर्न अप्ठ्यारो भएकोले प्रतिनिधिसभा विघटन गर्नुपरेको बताए। 

‘सरकारलाई काम गर्न दिने वातावरण बनेन । सरकारलाई काम गर्न नदिने, सरकारलाई काममा व्यवधान खडा गर्ने, जहिल्यै पनि झमेला मात्रै सिर्जना गर्ने, केही व्यक्तिका व्यक्तिगत आकांक्षा, महत्वकांक्षाहरू र पदलोलुपताजस्ता कुराले राष्ट्रिय राजनीतिलाई नै प्रदूषित गर्न खोज्ने । स्थिरता र स्थायित्वतर्फ देशलाई अघि बढ्न नदिएर राजनीतिलाई फेरि बहुमतलाई टुक्रयाउने, बहुमतलाई खण्डित गर्ने, बहुमतलाई ध्वस्त पार्ने र फेरि अस्वस्थ, अनुचित अलोकतान्त्रिक लेनदेन, गठजोड, जालझेल, तिकडम, षड्यन्त्रबाट देशको राजनीतिलाई, फेरि ६–६ महिनामा प्रधानमन्त्री फेरिने खालको अस्थिरतातर्फ धकेल्ने । काम हुन नपाउने, जोडघटाउ, मोलतोल, लेनदेनमै सरकारको समय बित्ने, संसद्लाई प्रभावकारी ढंगले काम गर्न नदिने,’ उनले राष्ट्रिय सभा बैठकलाई सम्बोधन गर्दै भने, ‘कतिपय विधेयकहरू अड्काइदिने । सरकारले संसद्समक्ष प्रस्तुत गरेका प्रस्ताव निर्णयार्थ प्रस्तुत पनि नगरिदिने, र यो प्रणाली बेठीक भो भन्ने निष्कर्ष निकाल्न खोज्ने, संविधान भो भन्ने निष्कर्ष निकाल्न खोज्ने, संघीय लोकतान्त्रिक गणतन्त्र चल्ने व्यवस्था हाेइन यो, चल्दैन भन्ने निष्कर्ष निकाल्ने खोज्ने, त्यस्ता प्रयासहरू भए ।’