- वि.सं २o७७ पौष १३ सोमबार
धनगढीमा भएको दुई प्रहरी हत्या घटनाका मुख्य अभियुक्त पक्राउ परेका छन् ।
धनगढी उपमहानगरपालिका– १०, का ३४ वर्षीय सुकबहादुर भनिने अमर रानालाई पक्राउ गरिएको जिल्ला प्रहरी कार्यालयले जनाएको छ ।
घटनापछि भारतमा लुकेर बस्दै आएका रानालाई नेपालतर्फ आइरहेका वेला आइतबार राति धनगढी– १९, फूलबारीस्थित नेपाल–भारत सीमा क्षेत्रबाट पक्राउ गरिएको जिल्ला प्रहरी प्रमुख प्रहरी उपरीक्षक अनुपमशमशेर जबराले बताए ।
पक्राउ परेका रानालाई प्रहरीले आजै अदालतमा पेस गर्ने तयारी गरेको छ ।
धनगढी–१२, जुगेडास्थित अस्थायी प्रहरी पोस्टका इन्चार्ज प्रहरी सहायक निरीक्षक गोविन्द विक र प्रहरी जवान रामबहादुर साउदको गत १ कात्तिकको राति हत्या गरिएको थियो ।
राति गस्तीमा गएका साउद र विकको हत्या नेपालबाट भारततर्फ केराउ तस्करी गर्ने समूहले गरेको खुलेको थियो ।
हत्या अभियोगमा पक्राउ परेका आठजना अभियुक्त पुर्पक्षका लागि यसअघि नै कारागार चलान भइसकेका छन् ।
धनगढी–१०, का पर्कु भनिने ३१ वर्षका रोहित राना, २० वर्षका राजेन्द्र राना, चोर भनिने ३० वर्षका सुरेश राना, गब्बर भनिने २५ वर्षका राजकुमार राना र २२ वर्षका रामनिवास राना पुर्पक्षका लागि कारागार चलान भएका हुन् ।
यस्तै, हत्याका अभियुक्त टल्लु भनिने २९ वर्षका दलराम राना, गोपाल भनिने २५ वर्षका रामगोपाल राना र २० वर्षीय रोहित राना पनि कारागार चलान भएका छन् । उनीहरू घटनालगत्तै पक्राउ परेका थिए ।
प्रहरी हत्या घटनासँग जोडिएको मटरको तस्करीमा संलग्न भएको आरोपमा पक्राउ परेका व्यापारी राजीव गुप्ता भने एक लाख ५० हजार रुपैयाँ धरौटी बुझाएर छुटेका थिए ।
नेपालबाट भारततर्फ केराउ तस्करी भइरहेको वेला रोक्न खोजेपछि प्रहरीको हत्या भएको थियो ।
तस्करले दुवैजनाको हत्या गरी नेपाल–भारत सीमा क्षेत्रमा बग्ने मोहना नदीमा फालेका थिए । हत्याका मुख्य योजनाकार सुकबहादुर रहेको प्रहरीले बताएको छ ।
