- वि.सं २o७७ पौष २ बिहीबार
मालपोत कार्यालय, तुलसीपुरका प्रमुख मालपोत अधिकृतसहित चारजनाविरुद्ध भ्रष्टाचार मुद्दा दायर भएको छ ।
दुई कर्मचारीलाई घुससहित रंगेहात पक्राउ गरी अनुसन्धान गर्दा कार्यालय प्रमुखसहित थप दुई कर्मचारीको संलग्नता देखिएको हो।
कार्यालयका नायव सुब्बा पुष्पराज गिरी र कार्यालय सहयोगी मीनराज गैरेलाई अख्तियार दुरुपयोग अनुसन्धान आयोगको टोलीले तीन लाख २० हजार रुपैयाँ घुससहित पक्राउ गरेको थियो ।
सुकुम्बासीको हैसियतले प्राप्त गरेको जग्गाको श्रेस्ता कायम गरी जग्गाधनी प्रमाणपुर्जा उपलब्ध गराउने आश्वासनमा उनीहरूले घुस लिएका थिए ।
अनुसन्धानको क्रममा मालपोत कार्यालय, तुलसीपुर दाङका कार्यालय प्रमुख मालपोत अधिकृत नरेशकुमार खड्का, मुद्दा फाँटका नायव सुब्बा केशवराज अधिकारीको समेत त्यसमा मिलेमतो देखिएपछि उनीहरूविरुद्ध समेत बिहीबार विशेष अदालतमा मुद्दा दायर भएको छ ।
चारैजनाविरुद्ध तीन लाख २० हजार बिगो कायम गरी मुद्दा दायर भएको हो ।
