- वि.सं २o७७ मङ्सिर ११ बिहीबार
कोभिड– १९ का कारण नौ महिनापछि नेपाली राष्ट्रिय क्रिकेट टिमको बन्द प्रशिक्षण सुरु भएको छ ।
कीर्तिपुरमा रहेको क्रिकेट मैदानमा राष्ट्रिय क्रिकेट टिमको आजबाट बन्द प्रशिक्षण सुरु भएको हो ।
प्रशिक्षक जगत टमटाको नेतृत्वमा नौ महिनापछि बन्द प्रशिक्षणमा फर्किएको टिमले स्वास्थ्य सुरक्षाका सम्पूर्ण मापदण्ड अपनाएको छ ।
सुरुमा बन्द प्रशिक्षणका लागि २२ जना खेलाडीलाई बोलाएको नेपाल क्रिकेट संघ क्यानले अहिले २७ जनालाई प्रशिक्षणमा राखेको छ ।
यद्यपि कप्तान ज्ञानेन्द्र मल्लसहित पाँचजना खेलाडी प्रशिक्षणमा सहभागी हुन पाएका छैनन् ।
कप्तान मल्लसहित उपकप्तान दीपेन्द्र सिंह ऐरी र रोहित पौडेललाई कोरोना पजिटिभ देखिएकाले मैदान उत्रिएका छैनन् ।
गत मंगलबार गरिएको परीक्षणमा उनीहरूमा कोरोना देखिएको थियो । वसन्त रेग्मी पनि संक्रमित छन् ।
अहिले रित गौतम, अनिल शाह, कुशल भुर्तेल, विक्रम शोव र लोकेश बमलाई पनि क्यानले बन्द प्रशिक्षणमा सहभागी गराएको छ ।
