भरतपुर अस्पतालमा कोरोना संक्रमणबाट थप एकजनाको मृत्यु भएको छ । तनहुँकाे शुक्लागण्डकी नगरपालिका घर भई हाल मकवानपुर हेटौँडा बस्ने ३३ वर्षीया महिलाको कोरोना संक्रमणका कारण मृत्यु भएको अस्पतालका सूचना अधिकारी लीलाधर पौडेलले जानकारी दिए ।
अस्पतालमा उपचाररत उनको आज बिहान ६:१५ बजे मृत्यु भएको पौडेलले बताए । पौडेलका अनुसार गत असोज ३० गते खोकी र श्वासप्रश्वासमा समस्याबाट पीडित भई अस्पतालमा भर्ना भएकी उनलाई सोही दिन कोरोना पुष्टि भएको थियो ।
उनको स्वास्थ्य अवस्था जटिल बन्दै गएपछि अस्पतालको कोभिड सघन उपचार कक्ष (आइसियू)मा भेन्टिलेटरको सहायतामा उपचार गरिएको थियो ।