कोरोनाकाे असर न्यायालयमा : सर्वोच्चमा दुई न्यायाधीश मात्र उपस्थित, बाँकी होम क्वारेन्टिनमा

सर्वोच्च अदालतमा सोमबार दुईजना न्यायाधीश मात्र उपस्थित भएका छन् । 

न्यायाधीशद्वय बमकुमार श्रेष्ठ र मनोजकुमार शर्मा मात्र अदालतमा उपस्थित भएका हुन् ।

आज केवल दुईवटा इजलास तोकिएको छ । बमकुमार श्रेष्ठको एकल इजलास र मनोजकुमार शर्मासहितको संयुक्त इजलास तोकिएको सर्वोच्च प्रशासनले जनाएको छ । 

आज १२ वटा पेशी रहेका छन् । हाल प्रधानन्यायाधीश चोलेन्द्रशमशेर जबरासहित १६ न्यायाधीश र केही कर्मचारीसमेत क्वारेन्टिनमा बसेका छन् । 

‘एकजना न्यायाधीशलाई कोराेना संक्रमण देखिएको हो । केहीअघि तीनजना इजलास अधिकृतलाई पनि देखिएको थियो,’ सर्वोच्चका एक अधिकारीले भने, ‘इजलास अधिकृत अन्य न्यायाधीशकोमा पनि जानुपर्ने हुन्छ । केहीअघि फुलकोर्ट पनि बसेको थियो । संयुक्त इजलास पनि राखिएको थियो । यी यस्ता कारणले सरेको हुन सक्छ भनेर उहाँहरू होम क्वारेन्टिनमा बस्नुभएको छ ।’

ती अधिकारीका अनुसार कोरोना लागेको भए लक्षण तीनदेखि पाँच दिनमा देखिने भएकाले केही दिन क्वारेन्टिनमै बसेर परीक्षण गराई सर्वोच्च फर्किने न्यायाधीशहरूको तयारी छ ।

हाल सर्वोच्चमा १९ न्यायाधीश रहेकोमा एकजनालाई संक्रमण देखिएपछि उनीसँग नजिक रहेका १६ जना सतर्कता अपनाउन क्वारेन्टिनमा बसेका छन् । 

‘हाललाई न्यूनतम सेवा दिइएको हो । उहाँहरू फर्किएपछि पुनः इजलास तोकिनेछ,’ ती अधिकारीले भने ।