कोरोना भाइरसको संक्रमण बढेसँगै करिब ६ महिना लकडाउनमा परेका लामो दूरीका सवारीसाधन १ असोजबाट सञ्चालनमा आएका छन् ।
लामोदू रीको सवारीसाधन सञ्चालनमा आएसँगै बाहिरी जिल्लाबाट काठमाडौं उपत्यका भित्रिनेको संख्या बढेको छ ।
नजिकिँदै गरेको चाडपर्व र कोरोना भाइरसबाट उत्पन्न समस्या कारण काठमाडौं उपत्यका छाड्नेको संख्या बढ्ने अनुमान गरिएको भए पनि उपत्यका भित्रिनेको संख्यामा वृद्धि भइरहेको महनगरीय ट्राफिक प्रहरी महाशाखाले जनाएको छ ।
१ असोजदेखि नै काठमाडौं उपत्यकामा बाहिरिनेभन्दा पनि भित्रिनेको संख्या बढेको हो ।
लामो दूरीको सवारीसाधन सञ्चालनमा आएको दिनमै नाै हजार चार सय ८० जना उपत्यकमा प्रवेश गरेको महाशाखाका प्रवक्ता एसपी रामेश्वरप्रसाद यादवले जानकारी दिए ।
त्यस्तै, १ असोजदेखि १० गतेसम्म काठमाडौं उपत्यकामा प्रवेश गर्नेको संख्या एक लाख ७४ हजार आठ सय ४४ जना रहेको एसपी यादवले जानकारी दिए ।
त्यस्तै १ असोजदेखि १० सम्ममा उपत्यका छाड्नेको संख्या एक लाख ६५ हजार दुई सय ४२ जना रहेको यादवले जानकारी दिए ।
योसँगै उपत्यकामा १ असोजदेखि १० सम्म बाहिरिनेको तुलनामा नाै हजार पाँच सय ९८ जना भित्रिने बढी रहेका छन् ।
विभिन्न पेसा, व्यवसायमा आबद्ध हुनेहरू उपत्यका भित्रिएका हुन सक्ने यादवले जानकारी दिए ।
कोरोना भाइरसका कारण सरकारले लामोदूरी र छोटाे दूरीका सवारीसाधनका लागि ५० प्रतिशत भाडादर बढाएको छ ।
तर, लामो दूरीका सवारीसाधन सञ्चालकरुले यात्रुसँग ६० प्रतिशतभन्दा बढी भाडासमेत लिने गरेको पाइएको गुनासो आइरहेका छन् ।
सरकारले सिटक्षमता र भौतिक दूरीको कायम गर्ने भनिए पनि लामोदूरी र छोटो दूरीका सवारीसाधनमा अझै पनि सो नियम लागू भएको देखिँदैन ।
पछिल्लो समय कोरोना भाइरस संक्रमण काठमाडौं उपत्यकामा बढ्दो दरमा वृद्धि भइरहेको छ ।
ट्राफिक प्रहरी महाशाखाका एसएसपी भीम ढकालले सिटक्षमताभन्दा बढी यात्रु हाल्ने सवारीसाधनलाई कारबाही गरिरहेको बताए ।
‘हरेक नाकामा दूरी कायम भए–नभएको, स्यानिटाइजर राखिएको–नराखिएको, मास्क प्रयोग भए–नभएकोलगायतको विषयमा सबै हेरेर मात्र सवारीसाधनलाई भित्रिन र बाहिरिन दिएको र कतिपय सवारीसाधनलाई नियन्त्रणमै लिएर कारबाहीसमेत गरेका छौँ,’ ढकालले भने ।
यातायात व्यवस्था विभागले पनि लामोदूरीका सवारीसाधन चढेर यात्रा गर्ने यात्रुलाई सकेसम्म होटेलहरूमा खाना–नास्ता नखान, बीचमा लामो समयसम्म सवारीसाधन नरोक्न पनि आग्रह गरेको छ ।
विभागले विज्ञप्ति जारी गर्दै सरकारले तोकेको मापदण्डलाई कडाइका साथ लागू गर्न भनिएको छ ।
अग्रिम टिकट खोल्नेबारे छलफल जारी
दसैँ–तिहारका लागि अग्रिम टिकट खोल्नका लागि छलफल भइरहेको छ ।
नेपाल यातयात राष्ट्रिय महासंघका अध्यक्ष योगन्द्रनाथ कर्मचार्यले टिकट बुकिङ खोल्नेबारे छलफल जारी रहेको जानकारी दिए ।
१५ असोजदेखि टिकट खुला गर्ने तयारी भए पनि उपत्यका बाहिरिनेको संख्या नबढेको र कोरोना भाइरसका कारण कसरी टिकट सञ्चालनमा ल्याउने र कसरी व्यवस्थापन गर्ने भन्ने विषयमा बस व्यवयायी र सरकारी निकायबीच छलफल गर्ने काम भइरहेकाे कर्माचार्यले बताए ।
‘हामी छलफल गर्दै छौँ, सम्भवतः असोजको तेस्रो हप्तासम्ममा केही टुंगो लाग्न सक्ने गरी छलफल भइरहेको छ,’ कर्मचार्यले भने ।
यस वर्ष कोरोना भाइरसको संक्रमणका कारण अनलाइन प्रणालीबाट टिकट काट्ने तयारी भइरहेको छ ।
तर, अनलाइनबाट कसरी टिकट काट्ने भन्ने धेरैलाई जानकारी नभएकाले केही स्थानमा भने दूरी कायम राखेर भए पनि टिकट बुकिङ खुला गर्ने सरकारको तयारी रहेको छ ।