सिराहा प्रहरीले कर्जन्हा नगरपालिका– ३ बाट शनिबार सवारी ज्यानमुद्दा र जबर्जस्ती करणीका दुई अभियुक्तलाई पक्राउ गरेको छ ।
जिल्ला प्रहरी कार्यालय सिराहाका अनुसार काभ्रेपलाञ्चोक जिल्लाका सवारी ज्यान मुद्दामा फरार रहेका प्रतिवादी सन्तोष बुढाथोकीलाई शनिबार साँझ कर्जन्हा– ३ बन्दीपुरस्थित उनकै घरमा लुकिछिपी बसिरहेको अवस्थामा पक्राउ गरिएको हो ।
इलाका प्रहरी कार्यालय मिर्चैयामा राखेर थप अनुसन्धान गरिरहेको प्रहरीले प्रतिवादी बुढाथोकीविरुद्ध रहेको सवारी ज्यानसम्बन्धी थप विवरण खुलाएको छैन ।
त्यस्तै, १० भदौमा कर्जन्हाकी १३ वर्षीया बालिकालाई जबर्जस्ती करणी गरेको पीडितकी आमाले दिएको उजुरीको आधारमा प्रहरीले शनिबार कर्जन्हा– ३ का ४५ वर्षीय घेमा भनिने रामचन्द्र सदालाई पक्राउ गरेको छ ।
पीडित बालिका र आरोपी सदाको सिराहा अस्पतालमा शनिबार राति स्वास्थ्य परीक्षण गरिएको इलाका प्रहरी कार्यालय मिर्चैयाका प्रमुख डिएसपी सन्तुलालप्रसाद जैसवालले बताए ।