सेती नदी किनारमा आमाछोरी मृत भेटिए
सेती नदीकिनारामा आमा र छोरी मृत अवस्थामा भेटिएका छन् । मृत्यु हुनेमा व्यास नगरपालिका– १ निर्मलनगरका ३४ वर्षीया रविना श्रेष्ठ र उनकी १० वर्षीया छोरी प्रिया श्रेष्ठ रहेकी छन् ।
शनिबार रिसिङ गाउँपालिका– १ कोइदिमस्थित सेतीनदीमा रविनाको शव र त्यसको करिब एक किलोमिटर तल छोरी प्रियाको शव सेतीनदीमा तैरिएको अवस्थामा स्थानीयले देखेपछि प्रहरीलाई खबर गरेको जिल्ला प्रहरी कार्यालय तनहुँका प्रहरी नायव उपरीक्षक लीलाराज लामिछानेले जानकारी दिए ।
शवलाई पोस्टमार्टमका लागि दमौली अस्पतालमा पठाइएको छ । घटनाको विषयमा थप अनुसन्धान भइरहेको उपरीक्षक लामिछानेले बताए । यसको दुई दिनअगाडि १५ वर्षीय छोरा विपिन श्रेष्ठ घरमै मृत अवस्थामा भेटिएका थिए । विपिन शारीरिक रूपमा असक्त थिए । मृतक रविनाका श्रीमान् भने रोजगारीका लागि विदेशमा छन् ।