बाढी प्रभावित तीन जिल्लामा सशस्त्र प्रहरी बल नेपालको १२ वटा अस्थायी बेस स्थापना

सशस्त्र प्रहरी बल नेपालले बाढी प्रभावित तीन जिल्लामा १२ वटा अस्थायी बेस स्थापना गरेको छ। धादिङमा २, नुवाकोटमा ६ र रसुवामा ४  वटा बेस स्थापना भएका हुन्। जसअन्तर्गत धादिङको मलेखु र गल्छी, नुवाकोटको देवीघाट, कोलोनी, रातमाटे, तारकेश्वर, वेत्रावती र तारुका तथा रसुवाको त्रिशूली हाइड्रो ३ ए, त्रिशूली हाइड्रो ३ बी , स्याफ्रुबेँसी र बोगटप्टारमा गरी १२ वटा बेस स्थापना भएको हो। 

 उद्धार कार्यलाई थप प्रभावकारी बनाउन स्थापना भएका बेसमध्ये धादिङको मलेखु र नुवाकोटको तालकेश्वरमा मेडिकल टोलीसमेत  खटिएको सशस्त्रले जनाएको छ। ती बेसहरूमा १५ देखि ३५ जनासम्मको संख्यामा उद्धार टोली खटाइएको छ भने विशेष तालिमप्राप्त उद्धारकसमेत रहेका छन्। ती बेसमा कोल्याप्स स्ट्रक्चर सर्च एन्ड रेस्क्यु (सिएसएसआर), मेडिकल फस्ट रेस्पोन्डर( एमएफआर), के ९ डग स्वार्ड ,  ड्रोन, रोप रेस्क्यु डेड बडी म्यानेजमेन्ट,  गोताखोर, स्विफ्ट वाटर रेस्क्यु टिम, मास क्याजुअल्टी भेकल (एमसिभी ) सहितका विशेष टोली परिचालन गरिएको डिएसपी शैलेन्द्र थापाले जानकारी दिए।