चर्चित ३८ क्विन्टल सुन तस्करी तथा सनम शाक्य हत्या कसुरमा आजन्म कैद सजाय पाएका मुख्य अभियुक्त गोरे भनिने चूडामणि उप्रेतीलाई अदालतले सजाय थप गरेको छ ।
उच्च अदालत विराटनगरले साढे ३३ केजी सुन तस्करी र सनम शाक्य हत्या कसुरमा जिल्ला अदालत मोरङबाट आजन्म कैद सजाय पाएका मुख्य अभियुक्त मोरङ उर्लाबारीका गोरे भनिने चूडामणि उप्रेतीलाई उच्च अदालत विराटनगरले १० वर्ष कैद सजाय थप गरेको हो ।
उच्च अदालत विराटनगरका न्यायाधीशद्वय महेन्द्रनाथ उपाध्याय र प्रकाशचन्द्र अधिकारीको संयुक्त इजलासमा एक हप्तादेखि भएको सुनुवाइपछि २५ माघमा मुख्य अभियुक्त गोरेलाई सनम शाक्यको हत्या कसुरमा थप दश वर्ष कैद सजाय थप भएको हो ।
उच्च अदालत विराटनगरले सनम शाक्य हत्या कसुरमा जिल्ला अदालत मोरङबाट जन्मकैद (२० वर्ष) सजाय अभियुक्तहरू नरेन्द्र कार्की, मोहन काफ्ले र भोजराज भण्डारीको सजाय १० वर्ष घटाएर १० वर्ष मात्रै कायम गरेको छ । उक्त कर्तव्य ज्यान मुद्दामा मतियारका रूपमा संलग्न रहेका अभियुक्त मदन सिलवाललाई जिल्लाको फैसला उल्ट्याउँदै तीन वर्ष मात्रै कैद सजाय सुनाएको छ। अभियुक्तहरू लाक्पा शेर्पा र भविन तामाङको हकमा भने जिल्ला अदालतकै आजन्म कैद सजायको फैसला सदर गरेको छ ।
सुन तस्करी प्रकरण कसुरमा संलग्न प्रहरी अधिकारीहरूसहित अन्य अभियुक्तहरूको हकमा जिल्ला अदालत मोरङले सफाइ दिएको फैसलालाई नै सदर गरेको छ । सफाइ पाउने प्रहरी अधिकारीहरूमा पूर्वडिआइजी गोविन्दप्रसाद निरौला, तत्कालीन एसएसपी श्यामबहादुर खत्री, दिवेश लोहनी, डिएसपी सञ्जयबहादुर राउत, प्रजित केसी र सइ बालकृष्ण सञ्जेललगायत छन् ।
०७४ मंसिरमा थाई एयरलाइन्सबाट आएको साढे ३३ केजी सुन गायब भएको थियो । सोही सुन खोजी गर्ने क्रममा १८ फागुन ०७४ मा सुन तस्करीका नाइके चूडामणि उप्रेती (गोरे)का सहयोगी मोरङ उर्लाबारी नगरपालिका ७ का युवा सनम शाक्यको हत्या भएको थियो । उनको शव १९ फागुनमा स्कारपियो जिपभित्र विराटनगर– १, पोखरियामा फेला परेको थियो ।
घटनास्थलबाट तत्काल टेकराज मल्ल ठकुरी, मोहन काफ्ले र कृष्ण कार्की पक्राउ परेका थिए । उक्त हत्यापछि सरकारले उच्चस्तरीय छानबिन टोली गठन गरेर सुन तस्करीको छानबिन गरेको थियो । छानबिन समितिको प्रतिवेदनको आधारमा नेपाल प्रहरीले विभिन्न चरणमा सरकारी वकिलको कार्यालय मोरङमार्फत जिल्ला अदालत मोरङमा आपराधिक समूह स्थापना गरी सुन चोरी पैठारी निकासी गरी अवैध कारोबार गरेको र मानव अपहरण गरी हत्या गरेको आरोपमा ७७ जनाविरुद्ध अभियोग दर्ता गराएको थियो ।
सबै अभियुक्तहरूउपर २०१५ जुलाईदेखि २०१६ अगस्टसम्म संगठित आपराधिक सन्जाल बनाएर १७ अर्ब एक करोड ८० लाख ७१ हजार ४७३ रुपैयाँबराबरको ३७ लाख ९९ हजार ५६३ ग्रामबराबर सुन तस्करी गरेको र सनम शाक्यको अपहरण गरी हत्या गरेको अभियोगको माग दाबी थियो । संगठित सुन तस्करी र सनम शाक्य हत्या कसुरको उक्त मुद्दामा जिल्ला अदालत मोरङले मुख्य आरोपी चूडामणि उप्रेती (गोरे)सहित दशजना व्यक्तिलाई कैद सजाय भएको थियो ।
