- वि.सं २o८१ चैत २० बुधबार
पूर्वपरराष्ट्रमन्त्री एनपी साउदले क्षेत्रीय शान्ति तथा स्थिरता कायम राख्न बहुपक्षीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) महत्त्वपूर्ण रहेको बताएका छन्।
थाइल्यान्डको राजधानी बैंककमा सुरु भएको बिमस्टेकको छैटौँ सम्मेलनअन्तर्गत ‘बिमस्टेकका लागि अत्यावश्यक उपायहरू : क्षेत्रीय सहयोगका प्रमुख तत्त्वहरू’ विषयक सत्रलाई सम्बोधन गर्दै उनले यस्तो बताएका हुन्।
‘गरिबी निवारण, द्रुत आर्थिक विकास, व्यापार तथा लगानी प्रवर्द्धन, बहुआयामिक सम्पर्क विस्तार र क्षेत्रीय शान्ति तथा स्थिरता कायम राख्न बिमस्टेक महत्त्वपूर्ण छ,’ साउदले भने।
नेपाली कांग्रेसका नेता साउदले बिमस्टेक सदस्य राष्ट्रहरूको संयुक्त जिडिपी पाँच ट्रिलियन डलरभन्दा माथि भए पनि आपसी व्यापार सात प्रतिशतभन्दा कम रहेको उल्लेख गरे। ‘व्यापारिक प्रवाह विस्तार गरेर गरिबी न्यूनीकरण र दिगो विकासलाई प्रवर्द्धन गर्न सकिन्छ,’ उनले भने, ‘हामीले रिजनल भ्यालु चेन निर्माण गर्नुपर्ने देखिन्छ।’
साउदले पूर्वाधार र सम्पर्क सञ्जालको विस्तारमा पनि जोड दिए। ‘बिमस्टेक मास्टर प्लान फर ट्रान्सपोर्ट कनेक्टिभिटी २०२२ ले सडक, रेल, जलमार्ग, हवाई यातायात तथा बहुआयामिक सम्पर्क सुधारका परियोजनाहरू पहिचान गरेको छ। यी परियोजनाहरूको शीघ्र कार्यान्वयन आवश्यक छ,’ उनले भने।
साउदले सन् २०१८ मा नेपालको अध्यक्षतामा बिमस्टेक ग्रिड इन्टरकनेक्सन सम्झौता सम्पन्न भएको स्मरण गर्दै उक्त सम्झौताले क्षेत्रीय विद्युत् व्यापारका लागि मार्गप्रशस्त गरेको पनि बताए।
पूर्वपरराष्ट्रमन्त्री साउदले बिमस्टेक विकास कोष स्थापनाको आवश्यकतामा पनि जोड दिए। उनले बिमस्टेक विकास कोष स्थापना गरी पूर्वाधार, जलविद्युत् तथा अन्तरदेशीय प्रसारणलाइनजस्ता परियोजनाहरूका लागि वित्तीय स्रोत जुटाउनुपर्ने बताए।
बिमस्टेकले विश्व बैंक, एसियन डेभलपमेन्ट बैंकजस्ता संस्थाहरूसँग सहकार्य गर्दै पूर्वाधार विकासका लागि स्रोत परिचालन गर्न आवश्यक रहेको पनि साउदको भनाइ थियो। उनले हिमालयदेखि समुद्री तटसम्मको वातावरणीय सन्तुलन जोगाउन साझा प्रयास आवश्यक रहेको भन्दै जलवायु परिवर्तनका असरहरू न्यूनीकरण गर्न बिमस्टेकले संयुक्त रणनीति अपनाउनुपर्ने आवश्यकता औँल्याए।
