- वि.सं २o८१ पौष २२ सोमबार
त्रिभुवन अन्तर्राष्ट्रिय विमानस्थलबाट एक महिलाले तस्करी गरेको करिब आधा किलो सुन लुटिएको छ । अवैध सुन लुटपाटमा संलग्न रहेको अभियोगमा तीनजनालाई शुक्रबार प्रहरीले पक्राउ गरेको छ ।
पक्राउ पर्नेहरूमा नुवाकोट पञ्चकन्या गाउँपालिका– १ घर भई काठमाडौं टोखा नगरपालिका– १ झोर बस्ने २६ वर्षीय सुजन नेपाली, सिन्धुपाल्चोक चौतारा साँगाचोकगढी नगरपालिका– ३ घर भई काठमाडौं गोकर्णेश्वर बस्ने ३२ वर्षीया अनिता तामाङ भन्ने मिनसाङ लामा तामाङ र काभ्रेपलाञ्चोक तेमाल गाउँपालिका– १ घर भई काठमाडौं महानगरपालिका– ६ बस्ने २२ वर्षीय लालबहादुर तामाङ रहेका छन् ।
फ्लाई दुबईको उडानद्वारा पुस १४ गते नेपाल आएकी महिलाले लेसिलो स्वरूपमा प्याडजस्तो आकार बनाई भित्री वस्त्रमा लुकाइछिपाई सो सुन तस्करी गरेकी थिइन् । भक्तपुरबाट सो सुन लुटिएको थियो । जिल्ला प्रहरी परिसर भक्तपुर र काठमाडौं उपत्यका अपराध अनुसन्धान कार्यालय शाखा भक्तपुरबाट खटिएको प्रहरीले घटनामा संलग्न उनीहरूलाई ४३६ ग्राम सुनसहित पक्राउ गरेको हो ।
