जय ट्रफी एलिट कप : बलर हाबी हुँदा एकैदिन १७ विकेट

बलर हाबी हुँदा जय ट्रफी पुरुष एलिट कप, २०८१ को पहिलो खेलमा एकैदिन १७ विकेट झरेका छन् । वीरगन्ज र जनकपुरमा आइतबारदेखि दुईदिवसीय खेल सुरु भएको छ । वीरगन्जको नारायणी रंगशालामा पहिलो खेलमा विभागीय टोली त्रिभुवन आर्मीविरुद्ध नेपाल पुलिस क्लब १८ रनले पछि छ । टस हारेर ब्याटिङ गरेको आर्मीले ३४.४ ओभरमा अलआउट हुँदै १२१ रन बनायो । प्रत्युत्तरमा ब्याटिङ सुरु गरेको पुलिसले २४ ओभरमा सात विकेट गुमाएर १०३ रन बनाएको छ ।

खेलमा पुलिसका स्पिनर ललितनारायण राजवंशी एक्लैले सात विकेट लिए । उनले आर्मीका सन्तोष कार्की, तृतराज दास, सोमपाल कामी, बसिर अहमद, विवेक यादव, शाहब आलम र आकाश चन्दको विकेट लिए । पुलिसका कुशल भुर्तेल, सर्वन यादव र रसिद खानले समान एक विकेट लिए । दोस्रो इनिङ्समा आर्मीका शाहब आलमले पाँच तथा सोमपाल कामी र पवन कार्कीले समान एक विकेट लिएका छन् । 

चलेनन् ब्याटर
पहिलो ब्याटिङ गरेको आर्मीका लागि आशा गरिएका कुशल मल्लले २५, भीम सार्कीले २२, कप्तान विनोद भण्डारीले २१, बसिर अहमदले १२, सोमपाल कामीले ५ र सन्तोष कार्कीले १ रन बनाए । १८ रनले पछि परेको पुलिसका लागि अलराउन्डर गुल्सन झा ३४ रनमा अविजित छन् । यस्तै, अमित श्रेष्ठ १८, रसिद खान १६, शंकर रानाले १३ रन बनाएका छन् । नेपाल प्रिमियर लिगमा खराब प्रदर्शनपछि आलोचित भइरहेका ओपनरद्वय कुशल भुर्तेल र अजुन साउद पुनः पहिलो खेलमै गोल्डेन डक आउट भए । दुवै इनिङ्समा आशा गरिएका ब्याटरले धैर्य गर्न सकेका छैनन् ।

बागमती ६८ रनले पछि
जनकपुरस्थित रामजानकी मैदानमा भएको खेलमा मधेश प्रदेशविरुद्ध बागमती प्रदेश ६८ रनले पछाडि परेको छ । पहिलो दिनको खेल समाप्त हुँदा बागमतीले दुई विकेट गुमाएर ३४ रन बनाएको छ । बागमतीका लागि शुभ कंसाकार २२ र इशान पाण्डे ९ रन बनाएर खेलिरहेका छन् । रित गौतम ३ रन बनाएर पेभेलियन फर्किंदा आशुतोष घिरैया डकआउट भए । मधेशका लागि रुपेश सिंह र विशाल पटेलले समान एक विकेट लिए । टस हारेर ब्याटिङ रोजेको मधेश पहिलो इनिङ्समा १०२ रनमै समेटिएको थियो । मधेशका लागि मायन यादवले २१, विशाल पटेलले १६, नीरज यादवले १२, अभिषेक तिवारीले ११ र हिमांशु दत्तले १० रन बनाए । बागमतीका लागि कप्तान सन्दीप लामिछानेले पाँच, सूर्य तामाङले तीन तथा नन्दन यादव र प्रतिश जिसीले समान एक विकेट लिए ।

सबै टिमलाई खेल्न गाह्रो छ : आरिफ शेख, कप्तान, पुलिस 
एकैदिनमा ६० ओभर खेल्नुपरेको छ । विकेट सुकेकाले पनि खासै राम्रो प्रदर्शन हुन सकेन । यसले पुलिस क्लबका लागि मात्र होइन विपक्षी टिमलाई पनि असर गरेको छ । यस्तो प्रतियोगिता पनि यहाँ कम नै भएको छ । मौसमले खेल अलिकति ढिला सुरु भएकाले केही असर गरेको हो कि जस्तो लाग्छ । पहिलेको तुलनामा ग्राउन्ड राम्रो पनि भएको छ । यहाँको व्यवस्थापन पनि राम्रो भएको छ । यहाँ बिस्तारै ठुलाठुला प्रतियोगिता पनि आयोजना हुनुपर्छ ।

मौसम उपयुक्त भएन : विनोद भण्डारी, कप्तान, आर्मी 
यस्तो प्रतियोगिता नेपालमा नियमित नभका कारण ब्याटरले टिकेर खेल्न सकेनन् । यस्तो प्रतियोगिता नियमित रूपमा भएको भए खेल्न सहज हुन्थ्यो । यस्तै, बिहान ९ बजे सुरु हुने भनिएको खेल मौसमका कारण खेल १ बजे मात्र सुरु भयो । जसले गर्दा पनि खेल्न असर गरेको हो जस्तो लाग्छ । प्रतियोगिताका लागि मौसम पनि उपयुक्त नभएको हो कि जस्तो लाग्छ । ग्राउन्ड राम्र्रो छ, तर मौसमले गर्दा अलिकति खेलमा असर गरेको हो ।