- वि.सं २o८१ पौष २३ मंगलबार
नेपाल–भारत विकास सहकार्यअन्तर्गत भारत सरकारको आर्थिक सहयोगमा निर्माण भएको बागलुङस्थित भीमगिठे माध्यमिक विद्यालयको भवन मंगलबार हस्तान्तरण भएको छ । जिल्ला समन्वय समिति, बागलुङका प्रमुख अमरबहादुर थापा, बडिगाड गाउँपालिकाका अध्यक्ष गण्डकी थापा अधिकारी र काठमाडौंस्थित भारतीय राजदूतावासका काउन्सलर अविनाशकुमार सिंहले संयुक्त रूपमा विद्यालय व्यवस्थापन समितिलाई भवन हस्तान्तरण गरेका हुन् ।
मंगलबार विद्यालयमा आयोजित कार्यक्रमा जिल्लास्थित रानीतिक प्रतिनिधि, सरकारी अधिकारी तथा समाजसेवीहरू सहभागी थिए । भारतीय राजदूतावासका अनुसार ‘नेपाल–भारत विकास सहकार्य’अन्तर्गत भारत सरकारको अनुदान सहयोगमा विद्यालय भवन निर्माण भएको हो। भवन निर्माण परियोजनालाई उच्च प्रभाव सामुदायिक विकास परियोजनाको रूपमा अघि बढाइएको र जिल्ला समन्वय समिति, बागलुङमार्फत कार्यान्वयन गरिएको दूतावासले जनाएको छ ।
जिल्ला समन्वय समिति, बागलुङका प्रमुख, बडिगाड गाउँपालिकाका अध्यक्ष, राजनीतिक प्रतिनिधि तथा विद्यालय व्यवस्थापन समितिका अध्यक्षले विद्यालय भवन निर्माणका लागि भारतीय सहयोग भएकोमा सराहना गरेका थिए ।
प्राथमिक विद्यालयका रूपमा भीमगिठे माध्यमिक विद्यालय सन् १९५८ मा स्थापना भई सन् १९६८ मा निम्न माध्यमिक विद्यालयमा स्तरोन्नति भएको हो । सन् १९८८ मा यो विद्यालय माध्यमिक तहमा स्तरोन्नति भएको थियो । विद्यालयले कक्षा १ देखि १२ सम्म अध्यापन गराउँदै आएको छ । विद्यालयमा करिब ७०० विद्यार्थी अध्ययनरत छन् जसमा ५४५ जना छात्रा छन् ।
