- वि.सं २o८१ पौष २१ आइतबार
चालू आर्थिक वर्षको पहिलो चार महिनामा सबैभन्दा बढी वैदेशिक सहायता प्रतिबद्धता विपत् व्यवस्थापन क्षेत्रमा आएको छ । सरकारले कात्तिकसम्म ६६ अर्ब ७६ करोड रुपैयाँ वैदेशिक सहायता प्रतिबद्धता प्राप्त गरेको छ । यसमध्ये ३०.२ प्रतिशत वैदेशिक सहायता प्रतिबद्धता विपत् व्यवस्थापन क्षेत्रमा प्राप्त भएको अर्थ मन्त्रालयले जनाएको छ ।
चालू आर्थिक वर्षको कात्तिकसम्म वैदेशिक सहायता प्रतिबद्धता गत आर्थिक वर्षको सोही अवधिको तुलनामा २६ अर्ब सात करोड रुपैयाँले बढेको छ । गत आर्थिक वर्षको सोही अवधिमा कुल वैदेशिक सहायता प्रतिबद्धता ४० अर्ब ६९ करोड रुपैयाँ रहेको थियो । कुल सहायता प्रतिबद्धतामध्ये अनुदानको अंश ३५.६ प्रतिशत र ऋणको अंश ६४.४ प्रतिशत रहेको छ ।
अर्थ मन्त्रालयका अनुसार कुल सहायता प्रतिबद्धतामध्ये वातावरण र जलवायुमा २१.४ प्रतिशत, यातायातमा २०.१ प्रतिशत, कृषिमा १४.२ प्रतिशत र सामाजिक क्षेत्रमा ११.४ प्रतिशत रहेको छ । कुल सहायता प्रतिबद्धतामध्ये सबैभन्दा कम सुशासन क्षेत्रमा ०.६ प्रतिशत प्राप्त भएको छ । त्यस्तै, पूर्वाधारको क्षेत्रमा २.१ प्रतिशत रहेको मन्त्रालयको तथ्यांक छ ।
