गुल्मीका पदम खत्री १० वर्षदेखि बेपत्ता

सानाे छोरा सुजन ६ बर्षकाे हुँदा बाबु पदम बेपत्ता भएका हुन् । उनी अहिले १६ बर्षका भए । अर्को जेठाे छोरा सुशिल खत्री र छोरी सुशिलाको बिहे पनि भइसक्यो । पदमले आफ्ना सन्तान र परिवारको खुसीको लागि जीवनको उर्जा र उमेर परदेशमा बिताए । तर, परिवारमा खुसी देख्ने बेलामा अहिले उनी बेपत्ता छन् ।

कान्छो छोरा सुजनले बुबाको अनुहारको अनुमान मात्रै गर्छन् । तर, धेरै माया र स्पर्शको अनुभूति नै गर्न पाएनन् । ‘मेलापर्व र अप्ठ्यारो अवस्थामा बाबाको सम्झना धेरै आउँछ । मैले अनुहारको मात्रै याद गर्छु,' उनले भने, ‘बाबाकाे प्रतिक्षामै एक दशक बिते ।’

मुसिकोट नगरपालिका–८ वामी मैदानका पदम बहादुर खत्री ०७१ सालदेखि बेपत्ता छन् । पुसको १६ गते बिहान परदेश हिंडेका खत्री अहिलेसम्म घर फर्किएका छैनन् । उनलाई घर र परिवारले कुरिरहेका छन् ।

श्रीमती श्याम कुमारी खत्रीका अनुसार श्रीमान् पदमले घर छोड्नुपर्ने कुनै कारण थिएन । घर छोडेका तीन दिनपछि तनहुँ पुगेको खबरसम्म परिवारलाई आयो । तर, पदम तनहुँबाट कता पुगे कसैले देखे जानेनन् । सबै ठाउँ र आफन्तकोमा खोजी गरेपनि पत्ता नलागेको श्याम कुमारीले बताइन् ।

आफ्नो श्रीमान् वेपत्ता हुँदा श्रीमती श्याम कुमारीलाई यादहरुले पिरोलि रहेकाे छ । उनी भन्छिन्, 'घरको मुली मान्छे हुनुहुन्न । ठुलो छोरा र छोरीको विवाह पनि भइसक्यो । ६ बर्षको सानो छोरा १६ मा लाग्योे । छोराछोरीले बिहे गरिसके तर, श्रीमान अझै फर्किनु भएन । जीवनभर आशा मात्र रहिरह्यो ।’

परिवारका अनुसार पदमले भारतमा मजदुरी गर्थे । उनी एकपटक हल्याण्ड र जापान पनि गएका थिए । तर, उमेर छिप्पिदै गएपछि उनी स्वदेशमै उद्यमको खोजीमा थिए ।