तिमाङखोलामा आएको बाढीले काठेपुल बगाउँदा बेँसीसहर–चामे सडक अवरुद्ध

हिमाली जिल्ला मनाङको चामे गाउँपालिका- १, तिमाङको तिमाङखोलामा आएकाे बाढीले काठेपुल बगाएको छ । मंगलबार राति पौने आठ बजेतिर पुल बगाएपछि सडक अवरुद्ध भएको मनाङ प्रशासनले जनाएको छ ।

मनाङका प्रमुख जिल्ला अधिकारी सुवासकुमार लामिछानेले तिमाङखोलामा आएको बाढीले काठेपुल बगाउँदा बेँसीसहर–चामे सडकखण्ड अवरुद्ध भएको  बताए । वर्षा र बाढीपहिरो कम भएपछि तिमाङखोलामा अर्को विकल्प नहुन्जेल पुनः काठेपुल राखिने मनाङ प्रशासनले जनाएको छ । जिल्ला प्रशासन कार्यालय मनाङले वैकल्पिक व्यवस्था नहुञ्जेल उक्त क्षेत्रमा आवतजावत नगर्न र नगराउन अनुरोध गरेको छ ।

यसअघि पनि काठेपुल बनाएर सवारी आवतजावत भइरहेको तिमाङखोलामा तीन वर्षअघि बेलिब्रिज राखिएको थियो । ०७८ असारको भीषण बाढीले बेलिब्रिज बगाएपछि काठेपुल राखेर सवारी आवतजावत गरिएको थियो ।यस्तै, तिमाङकै तल्लो क्षेत्र तिमाङ छहराबाट गेग्रान थुप्रिँदा पक्की पुलसमेत धरापमा परेको छ ।