- वि.सं २o८१ असार ९ आइतबार
लगातारको वर्षापछि आएको पहिरोका कारण अवरुद्ध भएको डुम्रे–बेँसीसहर सडकखण्ड एकतर्फी सञ्चालन भएको छ। बेँसीसहर नगरपालिका– १ उदीपुर दलालमा लेदोसहितको पहिरो जाँदा आज बिहान ६ बजेदेखि सडक अवरुद्ध भएको थियो ।
सडक खुलाउन बिहानैदेखि सुरक्षाकर्मीको टोली परिचालन भए पनि निरन्तर पानी परिरहेकाले सडक खुलाउन ढिलाइ भएको जिल्ला प्रहरी कार्यालय लमजुङका सूचना अधिकारी थानेश्वर चापागाईंले बताए ।
सडक अवरुद्ध हुँदा सवारीसाधन तथा यात्रु अलपत्र परेका थिए । सडक एकतर्फी खुलेसगै बेँसीसहरबाट काठमाडौं, पोखरा, चितवनलगायतका स्थानमा जाने यात्रु र सो स्थानबाट बेँसीसहर र बेँसीसहर हुँदै हिमाली जिल्ला मनाङ जाने यात्रु आफ्नो गन्तव्यतर्फ लागेका छन् । डुम्रे–बेँसीसहर ४२ किलोमिटर रहेको छ ।
