- वि.सं २o८o फाल्गुण २ बुधबार
सहिद स्माकर ‘ए’ डिभिजन टोली मच्छिन्द्र क्लबले बागमती गोल्डकप फुटबल प्रतियोगितामा मंगलबार उद्घाटन खेलमा सर्लाहीको बागमती युथ क्लबमाथि ५–२ को फराकिलो जित निकालेको छ । मच्छिन्द्रका लागि हिसुब थपलिया, अभिषेक गुरुङ, क्रिस्टोफर चिजोवा, सौरभ लिम्बू र विमल घर्तीमगरले गोल गरेका थिए । बागमतीका लागि सुजन चौधरी र सुजन गौतमले गोल फर्काए । हिसुबले पहिलो मिनेटमै मच्छिन्द्रलाई १–० अग्रता दिलाए । उनले विमलको पासमा गोल गरे । खेलको ४३औँ मिनेटमा अभिषेकले मच्छिन्द्रलाई २–० को अग्रता दिलाए ।
पहिलो हाफमा मच्छिन्द्रले दुई गोलको अग्रता लिएको थियो । मध्यान्तरपछि खेल प्रतिस्पर्धात्मक बन्यो । दोस्रो हाफमा समग्रमा पाँच गोल भएका थिए । मच्छिन्द्रका क्रिस्टोफरले ५६औँ मिनेटमा ३–० का लागि गोल गरे । खेलको ७९औँ मिनेटमा सौरभ लिम्बूले मच्छिन्द्रलाई ४–० को स्थितिमा राखे ।
बागमतीले दुई मिनेटको अन्तरमा दुई गोल गर्दै खेलमा फर्कने प्रयास गरेको थियो । बागमतीका सुजन चौधरीले ८१औँ मिनेटमा गोल गरी टोलीलाई ४–१ को गोलअन्तरमा झारे । ८३औँ मिनेटमा सुजन गौतमले खेललाई ४–२ को अवस्थामा ल्याए । यसअघि बागमती प्रदेश सभाका सदस्य प्रेम बहादुर पुलामीले प्रतियोगिताको उद्घाटन गरेका थिए ।
बुधबार आयोजक बागमती खेलकुद विकास समिति र हिमालयन शेर्पाबीच बुधबार प्रतिस्पर्धा हुनेछ । हिमालयन शेर्पा तेस्रो संस्करणको उपविजेतासमेत हो । प्रतियोगितामा १० टोलीको सहभागिता छ । विजेता टोलीले १० लाख र उपविजेताले पाँच लाख रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले एक लाख र विधागत उत्कृष्ट खेलाडीले समान २५ हजार प्राप्त गर्नेछन् ।
