आयोजक कतारले एसिया कप फुटबल प्रतियोगिताको उपाधि रक्षा गरेको छ । प्रतियोगिताको शनिबार लुसियल रंगशालामा भएको उपाधि भिडन्तमा कतारले जोर्डनमाथि ३–१ को सानदार जित निकाली लगातार दोस्रोपटक उपाधि हात पारेको हो । दुईपटक उपाधि जित्ने राष्ट्रमा दक्षिण कोरिया र कतार रहेका छन् । जापानले सर्वाधिक चारपटक उपाधिमाथि कब्जा जमाएको छ ।
कतारका स्ट्राइकर अफिफले ह्याट्रिक गरेका थिए । उनले तीन वटै गोल पेनाल्टीद्वारा गरेका हुन् । उनले खेलको २२औँ मिनेटमा पहिलो पेनाल्टी गोल गर्दै कतारलाई १–० को अग्रता दिलाए । पहिलो हाफमा एक गोलले अगाडि रहेको कतार दोस्रो हाफमा दबावमा देखिएको थियो ।
खेलको ६७औँ मिनेटमा अल निमातले जोर्डनलाई १–१ को बराबरीमा पुर्याए । खेलको ७३ओँ मिनेटमा कतारले दोस्रो पेनाल्टी पायो । यसपटक पनि अफिफले सहजै गोल गरे । अन्तिम पाँच मिनेटको अतिरिक्त समयमा अफिफले नै पेनाल्टीमा गोल गर्दै कतारलाई च्याम्पियन बनाए ।