- वि.सं २o८१ बैशाख २२ शनिबार
प्रथम चाबहिल जुत्ता–चप्पल व्यापार मेला सुरु भएको छ । मेलाको उद्घाटन बिहीबार नेपाल उद्योग वाणिज्य महासंघका उपाध्यक्ष हेमराज ढकालले गरेका हुन् । एक महिनासम्म चल्ने मेलामा १४ उद्योगका ३० भन्दा बढी ब्रान्डका तीन हजारभन्दा बढी डिजाइनका जुत्ता–चप्पल राखिएको छ ।
एक सयभन्दा बढी स्टलहरूमा नेपाली ब्रान्डका जुत्ता–चप्पल राखिएको आयोजकले जनाएको छ । जुत्ता–चप्पल कारखानाकै मूल्यमा १५ देखि ५० प्रतिशसम्म छुटको व्यवस्था गरिएको मेला संयोजक दिवाकर गिरीले जानकारी दिए । यो मेलामा चाबहिल, गौशाला, चुच्चेपाटी, बौद्ध, जोरपाटी, आरुबारी, साँखुलगायत वरपरका उपभोक्तालाई जोड्ने लक्ष्य राखिएको उनले बताए ।
नेपाली बजारमा करिब ६५ प्रतिशत योगदान नेपाली जुत्ता–चप्पल उत्पादनले गर्न सफल भएको उद्योगी रामकृष्ण प्रसाईंले बताए । उत्पादन क्षमता वार्षिक १६ करोड जोर रहेकोमा नेपाली बजारमा १० करोड माग रहेको, तर बिक्री भने ६ करोड मात्र रहेको उनको भनाइ छ ।
अझै यसलाई बजारीकरणका लागि विभिन्न स्थानहरूमा प्रदर्शनी तथा मेला गर्नुपरेको उनले बताए । एकमहिने मेलामा करिब पाँच करोड रुपैयाँबराबरका ३० देखि ३५ हजार जोरभन्दा बढी जुत्ता–चप्पल बिक्री हुने अनुमान गरिएको छ ।
