विश्व डिजिटल संस्करण

अमेरिकासँग लामो दूरीको ४०० क्षेप्यास्त्र खरिद गर्दै जापान

जापानले क्षेत्रीय सुरक्षा खतराको सामना गर्न सैन्य क्षमता बढाउनका लागि भन्दै बिहीबार अमेरिकासँग चार सयवटा लामो दूरीका टोमाहक क्षेप्यास्त्र खरिदसम्बन्धी एक सम्झौतामा हस्ताक्षर गरेको छ।

बढ्दो चिनियाँ शक्ति र आणविक हतियारयुक्त उत्तर कोरियाको सामना गर्दै जापान सरकारले सन् २०२७ सम्म आफ्नो रक्षा खर्चलाई दोब्बर बनाएर नाटोको मापदण्डअनुसार कुल गार्हस्थ्य उत्पादनको दुई प्रतिशतसम्म बनाउने योजना बनाइरहेको छ।

एक हजार छ सय किलोमिटरसम्म मार हान्न सक्ने दुई प्रकारका टोमाहकहरू दुई अर्ब ३५ करोड अमेरिकी डलरसम्मको बिक्रीलाई नोभेम्बरमा वासिंटनले अनुमोदन गरेको थियो।

‘यो हस्ताक्षरको निष्कर्षका साथ टोमाहक क्षेप्यास्त्र खरिद कार्य सुरु हुनेछ,’ टोकियो सम्झौतामा हस्ताक्षर भएपछि रक्षा मन्त्रालयका एक अधिकारीले बिहीबार पत्रकारहरूसँग भने, ‘रक्षा बजेटको सुदृढ कार्यान्वयनमार्फत हामी आफ्नो रक्षा क्षमतालाई व्यापक रूपमा सुदृढ गर्नेछौँ।’

जापानले अप्रिलदेखि लागू हुने अर्को आर्थिक वर्षका लागि ५६ अर्ब डलरको कीर्तिमानी रक्षा बजेट स्वीकृत गरेको छ। जापानसँग युद्धपछिको शान्तिवादी संविधान छ। उक्त संविधानले आफ्नो सेनालाई स्पष्ट रूपमा रक्षात्मक उपायहरूमा सीमित गर्दछ।

यद्यपि, गत वर्ष प्रमुख सुरक्षा तथा रक्षा नीतिहरूलाई अद्यावधिक गर्दा टोकियोले चीनले प्रस्तुत गरेका चुनौतीहरूलाई स्पष्ट रूपमा रेखांकित गर्‍यो।

अघिल्लो दिनको एक पत्रकार सम्मेलनमा अमेरिकी राजदूत रहम इमानुएलले जापानको नयाँ रक्षा प्रयासको प्रशंसा गरेका थिए। ‘आक्रमणकारीहरू झन्झन् थप जुझारु हुँदै जाँदा जापान आक्रामकताको लागत बढाएर शान्ति र समृद्धिको रक्षाका लागि जुट्ने मुलुकहरूमा अग्रपंक्तिमा रहेको छ,’ उनले भने। 

अमेरिकालाई इजाजतपत्रअन्तर्गत जापानमा बनेको प्याट्रियट क्षेप्यास्त्रहरू बिक्री गर्न सक्षम बनाउन गत महिना टोकियोले हतियार निर्यात नियन्त्रणलाई खुकुलो बनाएको थियो। युक्रेनलाई हतियार पठाएपछि अमेरिकाले आफ्नो स्टक भर्न खोजिरहेको छ।