अन्तिम समयको गोलसँगै साउदी अरेबियाले एएफसी एसियन कपमा ओमानमाथि २–१ गोलअन्तरको जित हासिल गरेको छ । १–० ले पछि परेको अवस्था उल्ट्याउँदै साउदी अरेबियाले महत्वपूर्ण तीन अंक आर्जन गर्याे ।
कतारको अल–रायनस्थित खलिफा अन्तर्राष्ट्रिय स्टेडियममा खेलको १४औँ मिनेटमा पेनाल्टीमार्फत गोल गर्दै ओमानले खेलमा अग्रता लिएको थियो । साउदीका डिफेन्डर असन अल तम्बाक्टीले डी बक्सभित्र मुहसेन अल घसानीलाई लडाएपछि ओमानले पेनाल्टी प्रहार गर्ने मौका पाएको थियो । जसलाई शतप्रतिशत सफल बनाउँदै सलाह अल याहयैले ओमानलाई अग्रता दिलाए ।
त्यसपछि साउदीले लगातार आक्रमण गरे पनि बललाई जाली चुमाउन लामो समय कुर्नुपर्याे । निरन्तरको प्रयासपछि ७८औँ मिनेटमा अब्दुल रहमान घरिबले खेललाई बराबरीमा ल्याए । पाँच डिफेन्डरलाई बिट गर्दै उनले सानदार गोल गरेका थिए ।
साउदीले त्यसपछि आक्रमणलाई अझ बढी तीव्र बनायो । निर्धारित ९० मिनेटपछि आठ मिनेट थपिएको थियो । त्यसको छैटौँ मिनेटमा साउदी अरबका अली अलबलाहीले हेडर गोल गर्दै जित सुनिश्चित गरे ।
जितपछि समूह एफमा थाइल्यान्ड र साउदी अरेबियाको तीन–तीन अंक भएको छ । पहिलो चरणको खेल सकिँदा ओमान र किर्गिस्तान अंकविहीन छन् ।
एसियाको सबैभन्दा प्रतिष्ठित फुटबल प्रतियोगिताअन्तर्गत आज साँझ सवा पाँच बजे चीनले लेबनानको सामना गर्नेछ । यस्तै, बेलुकी सवा आठ बजे कतारले ताजिकिस्तानसँग प्रतिस्पर्धा गर्नेछ ।