- वि.सं २o८o पौष १८ बुधबार
मधेश प्रदेशको जितपुर सिमरा उपमहानगरपालिकामा नौ वर्षपछि मनहर्वा गोल्डकप फुटबल प्रतियोगिता १३ देखि २० माघसम्म सुरु हुने भएको छ । यसअघि गोल्डकप अन्तिमपटक ०७१ सालमा भएको थियो ।
माघको जाडो मौसममा हुन लागेको प्रतियोगिता दिउँसो राखेको आयोजकले जनाएको छ । चिसोका कारण हुस्सु लाग्ने हुँदा आयोजकले दिउँसोको समयलाई मुख्य प्राथमिकतामा राखेको हो । आयोजक मौवा देवी युवा क्लबका अनुसार प्रतियोगिताको विजेता टोलीले दुई लाख र उपविजेता टोलीले एक लाख रुपैयाँ प्राप्त गर्नेछन् ।
हरेक खेलको म्यान अफ दी म्याच, प्रतियोगिका उत्कृष्ट खेलाडी, गोलरक्षक र सर्वाधिक गोलकर्तालाई पनि आकर्षक पुरस्कारको व्यवस्था गरिएको छ ।
