- वि.सं २o८१ बैशाख २० बिहीबार
नारायणगढ–मुग्लिन सडकखण्डको तुइन खोलामा पुल निर्माण गर्न यही ७ पुसदेखि दैनिक ४ घन्टा सवारी आवागमन बन्द हुने भएको छ ।
नागढुंगा–मुग्लिन सडक आयोजना पश्चिम खण्ड (नारायणगढ–मुग्लिन)ले आज एक सूचना जारी गरेर बिहान ११ बजेदेखि दिउँसो ३ बजेसम्म सडक बन्द गरेर काम गरिने जनाएको छ ।
नारायणगढबाट मुग्लिनतर्फ जाने सवारीसाधनमध्ये यात्रुवाहक सवारीसाधन पन्ध्रकिलो बजारदेखि जुगेडीसम्म रोकिनेछन् भने मालवाहक सवारीसाधन भतेरी जंगलदेखि रामनगरसम्म रोकिनेछन् ।
यसैगरी, काठमाडौंबाट आउने यात्रुवाहक सवारीसाधन मुग्लिन बजारदेखि मनकामना केबलकारसम्म र मालवाहक सवारीसधान लेवाटारमा रोक्नुपर्नेछ ।
पोखराबाट आउने यात्रीवाहक सवारीसाधन बेनीटारदेखि पावरहाउससम्म र मालवाहक सवारीसाधनलाई सत्रसय फाँटमा रोक्नुपर्ने आयोजनाले जनाएको छ ।
उक्त सडकका १९ वटा पुलमध्ये चारवटा चार वर्षअघि निर्माण भएका हुन्भने बाँकी १५ पुलको काम एकै साथ थालिएको थियो । (रासस)
