मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० फाल्गुण १२ शनिबार
  • Saturday, 24 February, 2024
नयाँ पत्रिका काठमाडाैं
२०८० मङ्सिर १७ आइतबार ०५:५१:००
Read Time : > 1 मिनेट
प्रेरक प्रसंग प्रिन्ट संस्करण

प्रेरक प्रसंग : दुई जोडी पदचिह्न

Read Time : > 1 मिनेट
नयाँ पत्रिका, काठमाडाैं
२०८० मङ्सिर १७ आइतबार ०५:५१:००

जन्मको ठीकअघि एक बालक भगवान्सित गुनासो गर्छन्– प्रभु, म नयाँ जन्म लिएर पृथ्वीमा जान चाहन्नँ, त्यहाँ खराब मानिस बस्छन् । भगवान्ले स्नेहपूर्वक सृष्टिको नियमअनुसार नयाँ जन्मको महत्व बताएर सम्झाएपछि बालक नयाँ जन्मका लागि तयार भए । 

बालकले भने– ठीक छ प्रभु, हजुरको यही इच्छा छ भने म मृत्युलोक जान तयार छु । तर, हजुरले मलाई एउटा वचन दिनुपर्छ । भगवान्ले भने– भन पुत्र, तिमी के चाहन्छौ ? बालकले भने– म जबसम्म पृथ्वीमा रहन्छु, एकछिन पनि हजुरले मेरो साथ छाड्न पाउनुहुन्न । भगवान्ले आफूले त्यस्तै गर्ने वचन दिए । बालकले भने– तर, पृथ्वीमा त हजुर अदृश्य हुनुहुन्छ । मैले हजुर मेरै साथमा हुनुहुन्छ भनेर कसरी थाहा पाउन सक्छु त ? भगवान्ले हाँस्दै जवाफ दिए– जब–जब तिमीले आफ्ना आँखा बन्द गर्नेछौ, तब–तब दुई जोडी पदचिह्न देख्नेछौ । तिनलाई देखेपछि म तिम्रो साथमै छु भन्ने सम्झनू । 

बालकको पृथ्वीमा जन्म भयो । केही समयमै उनी सांसारिक व्यवहारमा फसे । जसले गर्दा भगवान्सित भएको वार्तालाप भुले । जब उनी मृत्युको नजिक पुगे तब मात्र भगवान्ले आफूलाई दिएको वचन सम्झिए । भगवान्को वचन परीक्षण गर्न उनी केहीबेर आँखा बन्द गरेर आफ्नो जीवनको स्मरण गर्न लागे । उनले जन्मको समयदेखि नै दुईजोडी पदचिह्न देखे । तर, जब–जब उनी आफ्नो सबैभन्दा कठिन समयमा थिए, तब उनले एकजोडी पदचिह्न मात्र देखे । 

यो देख्दा उनी निकै दुःखी भए । दुःखको समयमा आफ्नो वचन पूरा गर्नुको साटो भगवान्ले उनलाई एक्लै छाडिदिएछन् भन्ने सोचेर उनी भगवान्सित रुष्ट भए । मृत्युपश्चात् उनी भगवान्सामु पुगे र रिसाउँदै भने– प्रभु ! हजुरले हरक्षण मेरो साथमा रहने वचन दिनुभएको थियो, तर संकटको समयमा त मेरो साथ छाडिदिनुभएछ । संकटको समयमा मैले एकजोडी पदचिह्न मात्र देखेँ । यसरी मलाई किन एक्लै छाडिदिनुभयो ?

भगवान्ले मुस्कुराउँदै भने– पुत्र, जब तिमी गम्भीर संकटमा थियौ, त्यतिखेर मेरो हृदय निकै द्रवित भयो । अनि, मैले तिमीलाई आफ्नो काखमा उठाएँ । त्यसैले, तिमीले मेरो एकजोडी पदचिह्न मात्र देखेका हौ ।