Skip This
विभागीय टोली त्रिभुवन आर्मी क्लब केपी ओली राष्ट्रिय टी–२० क्रिकेट प्रतियोगिताको फाइनलमा प्रवेश गरेको छ । पोखरा रंगशालास्थित क्रिकेट मैदानमा आज बिहान सम्पन्न सेमिफाइनलमा आर्मीले बागमती प्रदेशलाई चार विकेटले हरायो ।
टस जितेर पहिले ब्याटिङ गरेको बागमतीले निर्धारित २० ओभरमा सात विकेटको क्षतिमा एक सय २७ रन बनाएको थियो । जवाफमा जितका लागि पाएको एक सय २८ रनको लक्ष्य आर्मीले ६ विकेटको क्षतिमा १५ ओभरमै पूरा गर्याे ।
आर्मीको जितमा प्लेयर अफ दी म्याच घोषित सहाव आलमको घातक बलिङसामु बागमतीले ठूलो स्कोर बनाउन सकेन । आलमले चार विकेट लिएका थिए भने सोमपाल कार्मीले दुई तथा विवेक यादवले एक विकेट आफ्नो नाममा लेखाए । आर्मीका लागि भीम सार्कीले ३९, कुशल मल्लले २७ र विनोद भण्डारीले २५ रनको योगदान दिए ।
त्यसअघि पहिले ब्याटिङ गरेको बागमतीले प्रतीक श्रेष्ठको अर्धशतककाे मद्दतमा मध्यम लक्ष्य खडा गरेको थियो । ३५ बलमा चार छक्का र तीन चौका हानेका प्रतीकबाहेक अन्य ब्याटरले बागमतीका लागि ठूलो योगदान दिन सकेनन् ।
कप्तान सन्दीप लामिछानेले १९, रित गौतमले १४ र इशान पाण्डेले १२ रन बनाए । ब्याटिङमा ठूलो लक्ष्य राख्न चुकेको बागमतीले बलिङमा पनि कमाल देखाउन सकेन । सन्दीपले दुई तथा प्रतिश जिसी, इशान, सोनु देवकोटा र रितले एक–एक विकेट लिए ।
मदन भण्डारी स्पोर्टस् एकेडेमीको आयोजनामा भइरहेको प्रतियोगिताको सेमिफाइनलमा आजै मधेश प्रदेश र एपिएफ क्लबबीच दोस्रो सेमिफाइनल हुँदै छ । सो खेलको विजेता उपाधिका लागि आर्मीसँग भिड्नेछ ।
