Skip This
अन्तर्राष्ट्रिय प्रहरी संगठन (इन्टरपोल)को महासभामा सरकारले सशस्त्र प्रहरी बललाई पनि पठाउने निर्णय गरेको छ। केही वर्षयता नेपाल प्रहरीको नेतृत्व मात्र महासभामा सहभागी हुँदै आएको थियो।
बिहीबार बसेको मन्त्रिपरिषद्को बैठकले नेपाल प्रहरीका महानिरीक्षक वसन्तबहादुर कुँवर र सशस्त्र प्रहरी बलका एआइजी वंशीराज दाहाललाई महासभामा सहभागी हुन स्वीकृति दिएको छ। इन्टरपोलको ९१औँ महासभा १२ देखि १५ मंसिरसम्म अस्ट्रियामा हुँदै छ।
केही वर्षअघिसम्म इन्टरपोलको महासभामा सहभागी हुँदै आएको सशस्त्र प्रहरी नेतृत्वलाई पछिल्लो वर्ष सरकारले पठाएको थिएन। सशस्त्र प्रहरीलाई पनि आतंकवाद तथा संगठित अपराध नियन्त्रणसम्बन्धी जिम्मेवारी दिइएकाले इन्टरपोलमा उसलाई पनि सहभागी गराउने निर्णय गरिएको गृह मन्त्रालयका एक अधिकारीले बताए।
