खेलकुद प्रिन्ट संस्करण

आइसिसी टी–२० विश्वकप छनोट : सुपर ओभरमा ओमान च्याम्पियन

आइसिसी टी–२० विश्वकप एसियन छनोटअन्तर्गत उपाधि भिडन्तको सुपर ओभरमा नेपालले १० रन मात्र बनाउँदा ओमानलाई उपाधि

ओमानले आयोजक नेपाललाई सुपर ओभरमा हराउँदै आइसिसी टी–२० विश्वकप छनोटअन्तर्गत एसिया फाइनलको उपाधि जितेको छ । त्रिवि क्रिकेट मैदानमा नेपालले पहिलोपटक अन्तर्राष्ट्रिय टी–२० क्रिकेट प्रतियोगिताको सुपर ओभर खेल्दा हारको सामना गर्‍यो ।

एसिया छनोटको उपाधि भिडन्तमा नेपालले पहिलो ब्याटिङ गरी २० ओभरमा ६ विकेट गुमाएर एक सय ८४ रनको विशाल योगफल खडा गरेको थियो । ओमानले निर्धारित ओभरमा नौ विकेट गुमाएर एक सय ८४ रन बनाउँदा खेल टाई भयो । सुपर ओभरमा ओमानले २१ रन बनाएको थियो । नेपालले १० रन बनाउन सक्यो । नेपालले लगातार टी–२० को फाइनल गुमाएको छ । डेढ साताअगाडि त्रिकोणात्मक सिरिजको फाइनल पनि नेपालले गुमाएको थियो । नेपाल र ओमान अर्को वर्ष वेस्ट इन्डिज र अमेरिकामा हुने टी–२० विश्वकपमा छनोट भइसकेका राष्ट्र हुन् । 

 सुपर ओभरमा २२ रनको लक्ष्य 
सुपर ओभरमा नेपालले २२ रनको लक्ष्य पाएको थियो । ओमानबाट विलाल खान बलिङ गर्न आए । उनले पहिलो बलदेखि नै नेपाली ब्याट्सम्यानलाई दबाबमा राखे । प्रशिक्षक मोन्टी देसाईले कुशल भुर्तेल र गुल्शन झालाई ओपनिङमा पठाए । विलालले आफ्नो पहिलो बलमै भुर्तेललाई जिसन मक्सुदबाट क्याच गराए । कुशल मल्लले दोस्रो बलमा रन लिन सकेनन् ।

उनले तेस्रो बलमा एक रन लिए । चौथो बलमा गुल्शन झाले एक रन लिए । पाँचौँ र छैटौँ बलमा कुशलले चौका प्रहार गरे पनि जित दिलाउन सकेनन् । ओमानले सानदार ब्याटिङ गर्‍यो । ओमानका नसिम खुसीले १९ रन बनाए । उनले अभिनाश बोहराले फ्याँकेको सुपर ओभरमा तीन विशाल छक्का प्रहार गरेका थिए । नसिमले तीन छक्का प्रहार गर्दा त्रिवि मैदानमा फाइनल हेर्न पुगेका १५ हजार घरेलु समर्थक स्तब्ध बने । 

यसअघि लक्ष्य पछ्याएको इनिङ्सको अन्तिम ओभरमा ओमानलाई आठ रन आवश्यक थियो । नेपालका कप्तान सन्दीप लामिछानेलाई अन्तिम ओभर गर्न दिए । अनुभवी लेग स्पिनर सन्दीपले बलिङ गर्न आउँदा ओमानको हातमा चार विकेट बाँकी थियो । सन्दीपले कसिलो बलिङ गर्दै नेपाललाई खेलमा फर्काउन प्रयास गरेका थिए । उनको ओभरमा ओमानले सात रन बटुलेपछि फाइनल टाई भयो । इनिङ्सको १९.६ ओभरमा रनआउट हुँदा उपाधि भिडन्त रोमाञ्चक बनेको थियो । नेपालका लागि सन्दीपसँगै करण केसीले दुई विकेट लिए । 

 प्रजापतिको आक्रामक अर्धशतक
ओमानको ब्याटिङ इनिङ्समा ओपनर कश्यप प्रजापति आक्रामक रूपमा अर्धशतकीय इनिङ्स खेलेका थिए । उनले ५२ बलमा तीन चौका र चार छक्कासहित ६३ रन बनाउँदा ओमान निकै सहज अवस्थामा थियो । इनिङ्सको पहिलो बलदेखि नै उनी आक्रामक रूपमा प्रस्तुत भए । उनी आउट हुँदा ओमान १६.५ ओभरमा १४६/४ को स्थितिमा थियो । उनले दोस्रो विकेटका लागि अकिव इयाससँग ६७ रन र जेसन मक्सुदसँग आक्रामक रूपमा ४२ रनको साझेदारी गर्दैै नेपालमाथि दबाब सिर्जना गरे । अकिव इल्यासले ३३ र कप्तान मक्सुदले २६ रनको योगदान गरे । मोहम्मद नदिमले २४ तथा मेहरान खान र अयान खानले समान १० रन जोडे । 

 रोहित र गुल्शनको अर्धशतक
कीर्तिपुर मैदानमा टस जितेर पहिलो ब्याटिङ गरेको इनिङ्समा कप्तान रोहितकुमार पौडेल र गुल्शन झाले अर्धशतकीय इनिङ्स खेले । गुल्शन झाले २५ बलमा ५४ रनको इनिङ्स खेले । रोहितले ३७ बलमा ५२ रन बनाए । रोहितले ३६ बलमा पाँच चौका र दुई छक्का प्रहार गरेका थिए । उनको टी–२० आईमा यो पाँचौँ अर्धशतक हो । गुल्शन र रोहितले पाँचौँ विकेटका लागि ४३ बलमा ७८ रनको बलियो साझेदारी गरेका थिए । गुल्शनले २० बलमा पाँच चौका र चार छक्का प्रहार गरे । १५.४ ओभरमा उनले अर्धशतक बनाउँदा नेपाल १२४–४ को स्थितिमा थियो । सन् २०२२ मा फिलिपिन्ससँग डेब्यु गरेका गुल्शनको टी–२० आईमा पहिलो अर्धशतक हो । 

यसअघि ओपनर कुशल भुर्तेलले २२ बलमा ३१ रन बनाएर आउट भए । आठौँ नम्बर क्रिजमा आएका करण केसीले ६ बलमा २० रन बनाए । ओमानका विलाल खानले चार ओभरमा २६ रन खर्चेर तीन विकेट लिए । अकिवले दुई विकेट हात पारे । नेपालले २.४ ओभरमा १५ रन जोड्दा पहिलो विकेट गुमाएको थियो । ओपनर आसिफ शेखलाई ६ बलमा ६ रन बनाए । सन्दीप जोराले १३ बलमा १० रन जोडे । ओपनर भुर्तेल आउट हुँदा नेपाल ७.१ ओभरमा ४९/३ को स्थितिमा थियो । कुशल मल्ल आउट हुँदा नेपाल ९.६ ओभरमा ६०/४ को अवस्थामा रह्यो । 

 अकिव प्लेयर अफ दी सिरिज
ओमानका अलराउन्डर अकिव इल्यास ‘प्लेयर अफ दी सिरिज’ घोषित भएका छन् । ३१ वर्षीय खेलाडीले प्रतियोगितामा १० विकेट लिनुका साथै एक सय ६ रन जोडेका थिए । ओमानका ओपनर प्रजापति प्लेयर अफ दी म्याच घोषित भए । नेपालका कुशल भुर्तेल उत्कृष्ट ब्याट्सम्यान बने । उनले पाँच खेलमा एक अर्धशतकसहित एक सय ८५ रन बनाएका थिए । ओमानका विलाल खान उत्कृष्ट बलर घोषित भए । उनले पाँच खेलमा ११ विकेट लिएका हुन् । उत्कृष्ट नेपाली ‘प्लेयर अफ दी सिरिज’ अलराउन्डर गुल्सन झा घोषित भए । उनले एक थान पल्सर मोटरसाइकल प्राप्त गरेका छन् । 

अभिनाशले दबाब झेल्न सकेनन् 
मोन्टी देसाई, प्रशिक्षक, नेपाल
हामीले सुपर ओभर प्रशिक्षण नगरेको होइन । यस्तै हुन्छ भनी प्रशिक्षण गर्‍यौँ । विलालले दबाबमा पनि निकै राम्रो बलिङ गरे । अभिनाशले दबाब झेल्न सकेनन् । ओमानसँग दुवै खेलमा पराजित भयौँ । हामीले खेल हारेका होइनौँ, हामी एक बलले हार्‍यौँ । पहिलो खेलमा राम्रो ब्याटिङ गर्न सकेनौँ, त्यो हामीले स्विकारेका छौँ । तर, अन्तिममा कुनै एक टोली जित्दै थियो । जित ओमानको भयो । विवेक राम्रा खेलाडी हुन् । टोलीमा घुलमिल हुँदै छन् । दीपेन्द्रलाई जोखिम लिएनौँ । पछिल्लो ४८ घन्टामा हामीले क्रिकेट मात्र देखेनौँ, अरू कुरा पनि देख्यौँ । टोलीको समवेदना भूकम्पबाट निधन भएका नेपालीहरूप्रति पनि रहेको छ । हामी उनीहरूका लागि जित्न चाहन्थ्यौँ । 

विश्वले नेपाललाई हेर्नेछ
रोहितकुमार पौडेल, कप्तान, नेपाल
ओमानबाहेक प्रतियोगिता समग्रमा राम्रो भयो । उपाधि जित्न नपाउँदा दुःख लागेको छ । नेपाल विश्वकपमा छनोट भएको छ । यसले ठूलो अर्थ राख्छ । हामीलाई पूरा विश्वले हेर्नेछ । अब कसरी अगाडि बढ्ने भन्नेबारेमा खेलाडी र क्यान छलफल गर्नेछौँ । विश्वपका लागि ५–६ महिना बाँकी छ । खेलाडीलाई माथिल्लो स्तरमा पुर्‍याउनुपर्छ । विश्वकपको अवसरलाई राम्रो गर्नुपर्छ । पूर्वाधारको आवश्यकता छ । खेलाडीले अझै सुधार गर्नुपर्नेछ । अब घरेलु क्रिकेट पनि हुन जरुरी छ । खेलाडीले मात्र राम्रो प्रदर्शन गरेर केही हुँदैन । यसका लागि क्यान, नेपाल सरकारलगायतले पनि सोच्नुपर्छ । 

नेपाली समर्थकलाई धन्यवाद
जिसन मक्सुद, कप्तान, ओमान
दुवै टोलीलाई समर्थन गरेकोमा समर्थकलाई सुरुमा धन्यवाद दिन चाहन्छु । नेपालसँग खेल्दा निकै राम्रो हुन्छ । दुई खेल खेल्यौँ । नेपालसँग घरमै ठूलो समर्थकमाझ जित निकाल्न सफल भएका छौँ । हाम्रा खेलाडीले राम्रो प्रदर्शन गरेका छन् । खेलाडीले उच्च मनोबलका साथ खेले । प्रशिक्षक, टिम स्टाफ र व्यवस्थापन उत्कृष्ट रहँदा यो नतिजा आएको छ । नेपाली समर्थकले धेरै माया गरेका छन् । सधैँ सम्झनेछौँ ।