![](https://nayapatrika.blr1.cdn.digitaloceanspaces.com/news/images/bir-hospital2023-09-05-06-25-37.jpeg)
स्वास्थ्य जनशक्ति अभाव भइरहेको वीर अस्पतालमा थोरै संख्यामा भए पनि नयाँ कर्मचारी भर्ना गरिने भएको छ । स्वास्थ्यमन्त्री मोहनबहादुर बस्नेतको अध्यक्षतामा चिकित्सा विज्ञान राष्ट्रिय प्रतिष्ठान (न्याम्स)को आइतबार बसेको सिनेट बैठकले ६३ नयाँ दरबन्दी सिर्जनापछि नयाँ जनशक्ति थप गर्ने बाटो खुलेको हो ।
थप गरिएको दरबन्दी रेडियोग्राफर, प्लम्बर, नर्स, प्रयोगशालाकर्मी, पारामेडिक, सवारीचालकलगायततर्फको हो । नयाँ दरबन्दीमा डाक्टर नसमेटिए पनि ३० जना नर्स समेटिएका छन् । दरबन्दीसँगै नयाँ कर्मचारी पनि छिटोभन्दा छिटो भर्ना गरिने न्याम्सले जनाएको छ ।
हाल वीर अस्पतालमा सबैजसो शाखा तथा विभागमा कर्मचारी अभाव छ । एक साताअघि मन्त्री बस्नेतले विशेषज्ञ, एमबिबिएससहितका दुई सय ७६ जना स्वास्थ्यकर्मी निकालेपछि अस्पतालका सेवासमेत प्रभावित भइरहेका छन् । मन्त्री बस्नेतले तलब खुवाउन रकम नभएको भन्दै कोभिडका वेला राखिएका कर्मचारी हटाइएको बताउँदै आएका छन् ।