- वि.सं २o८१ बैशाख २० बिहीबार
नेकपा एमालेका अध्यक्ष केपी ओलीले सुवास नेम्वाङ आफ्नो सुखदुःखको साथी भएको बताएका छन् । सामान्य रुघाखोकी लागेर घरमा आराम गरिरहेका नेम्वाङलाई गएराति हृदयघात भएपछि उपचारका लागि राति १:३० बजे त्रिवि शिक्षण अस्पताल लगिएकाे थियाे । नेम्वाङकाे उपचारको क्रममा अस्पतालमै निधन भएको हाे ।
नेम्वाङको निधनपश्चात् शोक–वक्तव्य जारी गर्दै अध्यक्ष ओलीले भनेका छन्, ‘मेरा लागि उहाँ पार्टीको उपाध्यक्ष मात्र होइन, हितैषी मित्र र सुखदुःखको साथी हुनुहुन्थ्यो। लोकतान्त्रिक संविधान निर्माण गर्न उहाँले पुर्याउनुभएको योगदान सधैँ सम्झिरहनेछौँ। मृदुभाषी, विनम्र, शालीन मेरा साथी सुवास नेम्वाङप्रति भावपूर्ण श्रद्धाञ्जली ! उहाँका जीवनसंगिनी र परिवारजनमा गहिरो समवेदना व्यक्त गर्दछु। श्रद्धाञ्जली सुवासजी !’
