- वि.सं २o८o भदौ १८ सोमबार
सशस्त्र प्रहरी बल नम्बर २० विपत् उद्धार उपत्यका गण सिनामंगलमा कार्यरत २५ वर्षीया उषा थापाको जिम्मेवारी हरेक विपत्मा नागरिकको उद्धार गर्नु थियो । आइतबार पेप्सीकोला सवारी दुर्घटनामा उनले ज्यान गुमाएकी छिन् । सोही दुर्घटनामा सर्लाहीका राज भट्टराईको पनि मृत्यु भएको छ ।
मूलपानी बस्ने उषा आफूसँगै कार्यरत २९ वर्षीया सरस्वती खड्काको स्कुटरपछाडि बसेर कार्यालय जाँदै थिइन् । तर, अचानक सवारी दुर्घटनामा परिन् । स्कुटरचालक खड्काको असावधानीले दुर्घटना भएको प्रारम्भिक रिपोर्ट छ । आइतबार बिहान ७ः३० बजे उषा बा.प्र.०२–०३७ प ५३११ नम्बरको डिओ स्कुटरको पछाडि बसेर पेप्सीकोलास्थित छाप्रो पुग्दै थिइन् । त्यही वेला विपरीत दिशाबाट बा.३ख ४८४८ नंं को बस बत्तिँदै आएर बा.६च ५३४२ नं को बोलेरोमाथि ठोक्कियो ।
बसले स्कुटरलाई ठक्कर दियो । उषा सडकमा बजारिन पुगिन् । टाउकोमा गम्भीर चोट लागेकी उनलाई उपचारका लागि सिभिल अस्पताल लगियो । तर, बचाउन सकिएन । बसले बा.प्र.०२–०४१ प ४८३८ नम्बरको एफजेट मोटरसाइकललाई पनि ठक्कर दियो । मोटरसाइकलचालक राज सडकमै ढले । उपचारका लागि उनलाई पनि अस्पताल लगियो । तर, चिकित्सकले उनलाई पनि बचाउन सकेनन् । प्रहरीका अनुसार दुर्घटनामा स्कुटरचालक सरस्वती र बसमा सवार १३ यात्रु घाइते भए ।
जिल्ला प्रहरी परिसर काठमाडौंका प्रवक्ता एसपी कुमुद ढुंगेलले दुर्घटनामा १४ यात्रु घाइते भएका, जसमध्ये ११ यात्रु उपचारपछि घर फर्किएको बताए । ‘बिहान करिब ७: ३० बजे पेप्सीकोला छाप्रोमा बस दुर्घटना भयो । दुईजनाको मृत्यु भयो । १४ घाइते भए । जसमध्ये ११ यात्रु उपचारपछि घर फर्किएका छन् । बाँकी तीनजनाको उपचार भइरहेको छ,’ उनले भने ।
प्रहरीका अनुसार विपरीत दिशाबाट आएको स्कुटर जोगाउन खोज्दा बसले नियन्त्रण गुमाएर दुर्घटनामा परेको हो । प्रहरीको भनाइलाई घटनास्थलबाट प्राप्त सिसी क्यामरा फुटेजले पनि पुष्टि गरेको छ । परिसरका प्रवक्ता एसपी ढुंगेलले स्कुटरलाई जोगाउन खोज्दा बस चिप्लिएको र बोलेरोमा ठोक्किन पुगेको बताए । ‘घटनास्थलबाट प्राप्त सिसी क्यामरा फुटेज सरसर्ती हेर्यौँ । विपरीत दिशाबाट एउटा स्कुटरले सडक काटेको देखिन्छ । बसले उक्त स्कुटरलाई बचाउन खोजेको देखिन्छ । तर, तीव्र गतिमा रहेको हुँदा बस सडकमा चिप्लिएको देखिन्छ । र, गएर बोलेरोमा ठोक्किएको देखिन्छ । घटनामा सम्बन्धमा थप अनुसन्धान हुँदै छ,’ उनले भने ।
