- वि.सं २o८o श्रावण २४ बुधबार
अमेरिकाका पूर्वराष्ट्रपति डोनाल्ड ट्रम्प नकारात्मक टिप्पणी दिँदै आफूलाई मिडियासमक्ष प्रस्तुत हुन रुचाउँछन् । तीन वर्षअघि जो बाइडेनसँग राष्ट्रपतीय निर्वाचनमा पराजित भएपछि उनले केवल राजनीतिक पक्षमाथि मात्र आलोचना गरिरहे । पछिल्लोपटक उनको निसाना अमेरिकी महिला फुटबलमाथि रह्यो । दुईपटकको साबिक विजेता अमेरिका समूह चरणबाटै बाहिरिएको घटना जोड्दै ट्रम्पले आफ्नो टिप्पणी सार्वजनिक गरेका छन् ।
ट्रम्प मात्र नभएर विभिन्न पक्षबाट टोलीको आलोचना भइरहेको छ । तर, ट्रम्पले गरेको आलोचना अहिलेसम्मकै तिखो भएको मानिएको छ । उनले सर्वाधिक अनुभवी खेलाडी मेगन रापिनोएतर्फ इंगित हुँदै टिप्पणी गरेका छन् । उनी सबैभन्दा बढी मेगनसँग रिसाएका देखिन्छन् । उनले सुरुमा अमेरिका विश्वकपबाट बाहिरिनुलाई अप्रत्याशित रूपमा लिएका छन् ।
‘विश्वकपको नतिजा अपत्यारिलो र पीडादायी रह्यो,’ उनले भनेका छन् । उनले न्युजिल्यान्ड र अस्ट्रेलियाले संयुक्त रूपमा आयोजना गरिरहेको विश्वकपबाट अमेरिकाको अप्रत्याशित बहिर्गमनलाई राष्ट्रपति बाइडेनको नेतृत्व कुशलतासँग जोडेका छन् । ‘वर्तमान अमेरिकाका राष्ट्रपति बाइडेनको नेतृत्वमा रहेको एक समयको महान् अमेरिकालाई यो के भइरहेको छ ?’ उनले भने, ‘अमेरिकी खेलाडीले विश्वकपमा राष्ट्रिय गान गाउन अस्वीकार गरे ।’
राष्ट्रिय गान गाउन अस्वीकार
समूहगत चरणका खेलमा अमेरिकन खेलाडीले राष्ट्रिय गान गाउन अस्वीकार गरेका थिए । खेल सुरु हुनुअघि राष्ट्रिय गान गाउन अस्वीकार गरेपछि अमेरिकी खेलाडीको आलोचना भएको थियो । यद्यपि, यसमा केही पूर्वखेलाडीले वर्तमान खेलाडीको प्रतिरक्षा गरेका थिए । पूर्वराष्ट्रपति ट्रम्पले विश्वकपमा सहभागी अन्य राष्ट्रका खेलाडीले देखाउन नसकेको राष्ट्रिय भावना अमेरिकी खेलाडीले देखाएको भनी व्यंग गरेका छन् । ‘स्विडेनसँगको टाइब्रेकरमा मेगनको गज्जबको सट हेर्न अवसर पाएँ,’ उनले भने, ‘तिम्रो प्रहारले अमेरिका नर्कमा जाँदै छ ।’ पेनाल्टी सुटआउटमा ३८ वर्षीया मिडफिल्डर मेगनले असफल प्रहार गरेकी थिइन् । साबिक विजेतासमेत रहेको अमेरिका प्रिक्वार्टरफाइनलमा स्विडेनसँग टाइब्रेकरमा ५–४ ले स्तब्ध भएको थियो ।
