- वि.सं २o८१ बैशाख २० बिहीबार
गैरबैंकिङ कसुर र ठगी मुद्दामा जेल परेका इटहरीका श्रमिक लालबहादुर विश्वकर्माले सफाइ पाएका छन् । उच्च अदालत विराटनगका न्यायाधीशद्वय विपुल न्यौपाने र मिलनकुमार राईको मंगलबारको संयुक्त इजलासको आदेशसँगै उनी बुधबार थुनामुक्त हुने भएका छन् । जिल्ला अदालत सुनसरीको १९ पुस ०७८ को आदेश उल्ट्याएर उच्चले थुनामुक्त गर्न आदेश दिएको हो ।
जिल्ला अदालतले नौ महिनाअघि लालबहादुरलाई गैरबैंकिङ कारोबार मुद्दामा तीन करोड १४ लाख बिगो, ठगी मुद्दामा ७० हजार जरिवानासहित एक वर्ष ६ महिना जेलसजाय सुनाएको थियो । लालबहादुरसँगै कृष्णबहादुर विश्वकर्मा गजमेर र सीता विश्वकर्माले पनि गैरबैंकिङ कसुरमा सफाइ पाएका छन्, तर ठगी मुद्दामा भने सफाइ पाएनन् । तर, दीपक गजमेरको हकमा जिल्ला अदालतकै फैसला (१८ करोड ८४ लाख ६६ हजार ८८९ रुपैयाँ ठगी गरेको बिगो र ठगी मुद्दामा ७० हजार जरिवानासहित एक वर्ष ६ महिना थुना)ले निरन्तरता पाएको छ ।
लालबहादुर इटहरी उपपमहानगरपालिकास्थित तरहरामा दीपक गजमेरसहितको सिंहदेवी ज्वेलर्समा काम गर्थे । दीपकले मिटरब्याजमा स्थानीयलाई ऋण लिने दिने र बचत संकलन गराउने कार्य गर्दथे । तर, उनी बचत संकलन गरेको रकम लिएर फरार भए । बचतको रकम हिनामिना भएपछि २० असार ०७५ असारमा बचतकर्ता सुकमित गुरुङसहित नौजनाले ५२ लाख ६६ हजार रुपैयाँ ठगी गरेको भन्दै प्रहरीमा उजुरी गरेका थिए । प्रहरीले १८ करोड ६४ लाख ६६ हजार रुपैयाँ ठगी आरोपमा विनाइजाजत बैंक तथा वित्तीय कारोबार र ठगी गरेको कसुरमा मुद्दा चलाएपछि जिल्ला अदालतले सजाय तोकेको थियो ।
