- वि.सं २o८१ बैशाख १८ मंगलबार
लक्ष्मी बैंक र सनराइज बैंकले एकीकृत कारोबार सुरु गरेका छन् । लक्ष्मी सनराइज बैंकका नामबाट उनीहरूले एकीकृत कारोबार सुरु गरेका हुन् । यद्यपि, उनीहरूले औपचारिक कार्यक्रम भने गरेनन् ।
लक्ष्मी बैंकका अध्यक्ष रमण नेपाल र सनराइज बैंकका अध्यक्ष मोतीलाल दुगडले गत २५ पुस ०७६ मा मर्जरका लागि प्रारम्भिक सम्झौतामा हस्ताक्षर गरेका थिए । त्यसपछि ८ जेठ ०८० मा मर्जरको अन्तिम सम्झौता भएको थियो ।
उनीहरूले आवश्यक प्रक्रिया पूरा गरेर एकीकृत कारोबार सुरु गरेका हुन् । उक्त दुवै बैंक १:१ को स्वाप रेसियोमा मर्ज भएका हुन् । मर्जपछि बैैंकका प्रमुख कार्यकारी अधिकृत अजयविक्रम शाह बनेका छन् । अध्यक्ष भने सञ्चालक समितिको पहिलो बैठकले चयन गर्नेछ ।
दुवै बैंकको असार ३ गते सम्पन्न साधारणसभाले मर्जरसम्बन्धी प्रस्ताव पारित गरेका थिए । यस्तै, नेपाल राष्ट्र बैंकले असार २२ गते र कम्पनी रजिस्ट्रारको कार्यालयले असार २४ गते मर्जरका लागि अन्तिम स्वीकृति प्रदान गरेको थियो । मर्जरपछि बन्ने बैंकको केन्द्रीय कार्यालय हात्तीसार, काठमाडौंमा रहनेछ ।
मर्जरपछि दुई बैंकको चुक्ता पुँजी २१ अर्ब ६५ करोड रुपैयाँ पुगेको छ । साबिक लक्ष्मी बैंकको ११ अर्ब ५५ करोड रुपैयाँ र साबिक सनराइजको १० अर्ब ११ करोड रुपैयाँ चुक्ता पुँजी छ ।
मर्जरपछि बैंकको शाखा सञ्जाल दुई सय ८४ वटा पुगेका छन् । त्यस्तै, कर्मचारी संख्या तीन हजार एक सय ७० जना पुगेको छ । साबिक लक्ष्मीमा एक हजार ४२ जना र सनराइजमा एक हजार पाँच सय १७ जना कार्यरत छन् ।
