इमेज सहकारीका सञ्चालकविरुद्ध तीन दिनमा तीन सय ८९ जाहेरी दर्ता

इमेज बचत तथा ऋण सहकारी संस्था लि. बागलुङका बचतकर्ताले सहकारीका सञ्चालकविरुद्ध उजुरी दिएका छन्।

मंगलबारदेखि उजुरी दर्ता सुरु भएकोमा बिहीबार साँझसम्म तीन सय ८९ जना बचतकर्ताले उजुरी दर्ता गरेको जिल्ला प्रहरी कार्यालय बागलुङले जनाएको छ। 

बागलुङ, गलकोट र बुर्तिबाङमा सहकारी सञ्चालन गरी झन्डै दुई अर्ब रुपैयाँभन्दा बढी ठगी गरेर भागेको भन्दै बचतकर्ताले सहकारीका अध्यक्ष देवकुमार नेपालीविरुद्ध उजुरी दिएका छन्।

जेठको पहिलो साताबाटै सहकारीका अध्यक्ष देवकुमार नेपाली फरार भएपछि अलमलमा परेका बचतकर्ताले मंगलबारदेखि आवश्यक कागजात र प्रमाण जुटाएर जिल्ला प्रहरी कार्यालय बागलुङमा जाहेरी दिन थालेका हुन्। 

देवकुमार नेपाली फरार भएदेखि आन्दोलित बचतकर्ताले मंगलबारबाट मात्रै उजुरी दिन थालेको जिल्ला प्रहरी कार्यालय बागलुङका डिएसपी मदन केसीले बताए। 

‘सहकारीको विषयमा बाहिर जे–जति कुरा भए पनि औपचारिक रूपमा हामीकहाँ मुद्दा परेको थिएन, हामीले सार्वजनिक रूपमै आह्वान गरेका थियौँ,’ केसीले भने, ‘मंगलरबारदेखि मुद्दा दर्ता प्रक्रिया सुरु भएको छ।’ 

पहिलो दिन इमेज सहकारी अध्यक्ष देवकुमार नेपालीसहित सहकारीका सञ्चालकविरुद्ध १४ करोड २२ लाख ठगीको बिगो दाबी गर्दै ३७ जनाले मुद्दा दर्ता गरेको उनले बताए।

‘पहिलो दिन ३७ जनाको उजुरी परेकाे थिाे, बिहीबारसम्म तीन सय ८९ मुद्दा परेका छन्। हालसम्मको बिगो दाबी झन्डै ५० करोडको हाराहारी छ । बाँकी पनि आउँदै हुनुहुन्छ होला,’ उनले भने,  ‘बचतकर्ताले बचतसम्बन्धी कागजातसहित उजुरी दिएका छन्। जाहेरीसँगसँगै अनुसन्धान प्रक्रिया पनि अगाडि बढेकाे छ।’ 

सहकारीमा समस्या देखिएपछि अध्यक्ष देवकुमार नेपाली परिवारसहित सम्फर्कविहीन छन्। उनी सम्पर्कविहीन भएपछि सहकारी विभागले बागलुङ आएर अनुसन्धान गर्दा तीन ठाउँबाट गरी दुई अर्बभन्दा बढी निक्षेप संकलन गरिएको भेट्टाएको थियो। त्यसपछि यो मुद्दाको अनुसन्धान गर्न विभागले सिआइबीलाई अनुरोध गरेका थियो।

अहिले नेपाल प्रहरीको केन्द्रीय अनुसन्धान ब्युरो (सिआइबी)ले इमेज सहकारीका अध्यक्ष देवकुमार नेपालीसहित कार्यवाहक अध्यक्ष डोरबहादुर परियार, सचिव सुनील नेपाली, कोषाध्यक्ष लक्ष्मी सेन र सञ्चालक सदस्यहरू चित्रबहादुर भण्डारी, रूपा विक र झगबहादुर शाहीविरुद्ध बचतकर्ताहरूको अर्बाैँ रकम अपचलन गरी संगठित ठगी गरेकाले उनीहरूविरुद्ध उजुरी लिन र अनुसन्धान अगाडि बढाउन जिल्ला प्रहरी कार्यालय बागलुङलाई जेठ १६ गते पत्राचार नै गरेका थियो।

सिआइबीको पत्र प्राप्त भएपछि जिल्ला प्रहरी कार्यालय बागलुङका प्रमुख प्रहरी उपरीक्षक योगेन्द्रकुमार खड्काले डिएसपी मन केसीको कमान्डमा नाै सदस्यीय अनुसन्धान टोली बनाएर यो मुद्दामा छानबिन अगाडि बढाउन निर्देशन दिएका थिए। 

यद्यपि, बचतकर्ताले आधिकारिक रूपमा उजुरी नदिएका कारण अनुसन्धान प्रक्रिया अगाडि बढ्न सकेको थिएन। प्रहरी आफ्नो तरिकाबाट निगरानी बढाए पनि अनुसन्धानका लागि उजुरी जरुरी रहेको भन्दै प्रहरी विभिन्न माध्यमबाट बचतकर्तालाई उजुरी दिन आग्रह गर्दै आएको थियो। 

इमेज सहकारीबाट पीडित बागलुङका मात्रै एक हजारभन्दा बढी व्यक्ति आफूहरूको सम्पर्कमा आएको सबैलाई उजुरी दिन आग्रह गरिएको इमेज सहकारीपीडित संघर्ष समितिका अध्यक्ष दिलबहादुर कार्कीले बताए। 

०६९ सालदेखि बागलुङ सदरमुकाममा इमेज सहकारी सञ्चालन हुँदै आएको थियो। अन्य सहकारीको तुलनामा आकर्षक ब्याज दिने र चेक साटेर कर्मचारीले घरमै रकम उपलब्ध गराइदिने गरेका कारण धेरैले इमेजमा बचत गर्न थालेका थिए। 

बागलुङमा इमेजप्रतिको आकर्षण बढेपछि अध्यक्ष नेपालीले बुर्तिबाङ र गलकोटमा पनि इमेज सहकारीको शाखा खोलेका थिए। तरलता अभाव भएको भन्दै गत वैशाख पहिलो साता केही दिन सहकारी बन्द भएपछि समस्या झन् बल्झिँदै गएको हो। 

सहकारीको फितलो नियमन र अनुगमनको फाइदा उठाउँदै अध्यक्ष नेपालीले सहकारीको करोडौँ रुपैयाँ आफूखुसी घरजग्गालगायत विभिन्न क्षेत्रमा लगानी गरिरहेका थिए।

सहकारीको नियमविपरीत उनले घरजग्गा धितो राखेर पनि लगानी गरिरहेको देखिन्छ। छोटो समयमा धेरै नाफा कमाउने क्षेत्रमा लगानी गर्दा बचतकर्ताहरूको अर्बौँ रकम जोखिममा परेको हो। नेपालीले काठमाडौं, पोखरा, बागलुङ बजार र बुर्तिबाङ बजारमा घरजग्गामा लगानी गरेका थिए। 

घरजग्गामा लगानी गरेको रकम कारोबारमा मन्दी आएपछि समस्यामा परेको र सहकारीमा तरलताको व्यापक अभाव देखिएपछि अध्यक्ष देवकुमार नेपालीसहित अन्य सञ्चालकहरू जेठ ६ गतेदेखि फरार छन् भने अध्यक्ष नेपाली, श्रीमती छेला नेपाली र सञ्चालक चित्रबहादुर भण्डारीको नाममा रहेको घरजग्गा, सेयर तथा बैंक खाता रोक्का भएको छ।