१७औँ वार्षिकोत्सव विशेषांकफ्रन्ट पेजमुख्य समाचारसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २o८o जेठ १८ बिहीबार
  • Monday, 15 July, 2024
नयाँ पत्रिका काठमाडौं
२o८o जेठ १८ बिहीबार o७:५७:oo
Read Time : > 1 मिनेट
ad
ad
ad
ad
खेलकुद प्रिन्ट संस्करण

लिगमा आफिजको दोस्रो ह्याट्रिक

सहिद स्मारक ‘ए’ डिभिजन लिगको २३औँ चरणका खेल समाप्तिसँगै १८ गोल गरेका नाइजेरियन खेलाडी आफिज ओलावाले उच्च गोलकर्ताको शीर्ष स्थानमा

Read Time : > 1 मिनेट
नयाँ पत्रिका, काठमाडौं
नयाँ पत्रिका
२o८o जेठ १८ बिहीबार o७:५७:oo

मच्छिन्द्र फुटबल क्लबका विदेशी स्ट्राइकर आफिज ओलावाले सहिद स्मारक ‘ए’ डिभिजन लिग फुटबल प्रतियोगितामा दोस्रो ह्याट्रिक पूरा गरेका छन् । सातदोबाटोस्थित एन्फा कम्प्लेक्समा बुधबार मच्छिन्द्रले सातदोबाटो युथ क्लबविरुद्ध ३–१ को जितमा आफिजले तीन गोल गरेका हुन् ।

आफिजले पहिलो चरणमा खुमलटारविरुद्ध ह्याट्रिक गरेका थिए । सो खेलमा मच्छिन्द्रले खुमलटारविरुद्ध ७–३ को सानदार जित हात पार्दा आफिज एक्लैले पाँच गोल गरेका थिए । चालू लिगमा आफिज उच्च गोलकर्ता दौडमा शीर्ष स्थानमा छन् । नाइजेरियन खेलाडी आफिजले १८ खेलमा १८ गोल गरेका छन् ।

 आफिज पहिलोपटक दुईचोटिको साबिक विजेता मच्छिन्द्रमा अनुबन्ध भएका हुन् । अघिल्लो सिजन सर्वाधिक आठपटकको च्याम्पियन मनाङ मस्र्याङ्दी क्लबबाट उनले लिग खेलेका थिए । आफिजलाई पछ्याउने क्रममा खुमलटारका मेसुके ओलोमोउ र जावलाखेलका एनकोटो मासोआबीले समान १६ गोल गरेका छन् । फ्रेन्ड्सका राफिक अमिनु १३ गोल तथा नेपालका दीपकराजसिंह ठकुरी १२ गोलका साथ शीर्ष पाँचभित्र छन् । 

मच्छिन्द्र दोस्रो स्थानमा 
मच्छिन्द्रको सानदार जितसँगै जावलाखेल युथ क्लबको दोस्रो स्थान २४ घन्टा पनि टिकेन । सातदोबाटोविरुद्धको जितसँगै मच्छिन्द्र दोस्रो स्थानमा उक्लिएको छ । २३ खेलमा १० जित, नौ बराबरी र चार हारसहित मच्छिन्द्रले ३९ अंक जोडेको छ । शीर्ष स्थानको चर्च ब्वाइजको ४१ अंक छ । सातदोबाटो आठ जित, पाँच बराबरी र १० हारसहित २९ अंक जोडेर सातौँ स्थानमा छ । मच्छिन्द्र र सातदोबाटोबीच पहिलो लेग गोलरहित बराबरी भएको थियो । दोस्रो लेगमा आफिजले पहिलो हाफमा दुई र दोस्रो हाफमा एक गोल गरे । उनी खेलको ७५औँ मिनेटमा मैदानबाट बाहिरिएका थिए । 

खेलको १६औँ मिनेटमा दिवाकर चौधरीको पासमा आफिजले हेडिङ गोलबाट मच्छिन्द्रलाई १–० को अग्रता दिलाए । पहिलो हाफको इन्जुरी समयमा अफिजले व्यक्तिगत दोस्रो गोल गरे । उनको दोस्रो गोल उत्कृष्ट रह्यो । आन्द्रेस नियाले मिलाएको बललाई तीन खेलाडी बिट गर्दै आफिजले दोस्रो व्यक्तिगत गोल गरे । खेलको ५६औँ मिनेटमा आफिजले ह्याट्रिक पूरा गरे । जापानी खेलाडी सुजुकीले मिलाएको पासमा आफिजले मच्छिन्द्रलाई ३–० को अग्रता दिलाएका हुन् ।  

च्यासल मैदानमा थ्री स्टार क्लब र संकटा क्लबले गोलरहित बराबरी खेल्दै अंक बाँडेका छन् । थ्री स्टारले १२ खेलमा जित निकाल्न सकेको छैन । 

ad
ad
ad
ad