‘ओरेन्सिया सुसुगामोसी’ नामक जीवाणुले संक्रमित किर्नाले टोकेपछि स्क्रब टाइफस लाग्छ । प्रायजसो मुसा वा अन्य जीवजन्तुको शरीरमा बस्ने यस्तो संक्रमित किर्नाले टोकेको ५ देखि ६ दिनमा मानिसलाई ज्वरो आउने, शरीरमा रातो बिमिरा आउने, शरीर दुख्ने, ग्रन्थि सुन्निनेलगायत लक्षण देखिन्छन् ।
परजीवीले टोकेको भागमा कालो दाग देखिन्छ र कतिपयको नदेखिन पनि सक्छ । यो जीवाणु छालाबाट शरीरभित्र पसेपछि रगतका माध्यमबाट अन्य भागमा सर्छ । समयमै उपचार नभए यो शरीरका अन्य अंग मुटु, कलेजो, फोक्सो, मिर्गौलामा समेत फैलिएर बिरामीको मृत्यु हुन सक्छ ।
लक्षण
अत्यधिक ज्वरो आउने ।
शरीरमा रातो बिमिरा आउने ।
शरीर दुख्ने, आँखा रातो हुने ।
खोकी, बान्ता, पेट दुखाइ र पखालाले सताउने ।
ग्रन्थिहरू सुन्निने ।
पसिना आउने ।
श्वासप्रश्वासमा समस्या देखिने ।
कसरी बच्ने ?
झाडी या बारीमा जथाभावी नबस्ने र नांगो खुट्टाले नटेक्ने ।
घरवरिपरि सफा राख्ने, चौर या झाडीमा नसुत्ने ।
खेतबारीमा जाँदा पन्जा प्रयोग गर्ने । शरीर ढाक्ने लामो कपडा लगाउने ।
लक्षण देखिएमा स्वास्थ्य संस्थामा गएर उपचार गर्ने । जथाभावी औषधिको सेवन नगर्ने ।
आराम गर्ने । प्रशस्त पानी पिउने ।