- वि.सं २o८o जेठ २ मंगलबार
भक्तपुरको पलाँसेमा सञ्चालित ‘दाउरा चुलो’ रेस्टुरेन्टले ग्राहकलाई मौलिक परिकार पस्कँदै आएको छ । हातले सिलौटामा पिँधेको मरमसला हालेर दाउरा–चुलोमा पकाइएका खानेकुरा सर्भ गर्ने गरिएको रेस्टुरेन्टका सञ्चालक विष्णुप्रसाद सापकोटाले बताए । काभ्रेको मण्डन–देउपुर घर भएका सापकोटाले गाउँघरकै जस्तो स्वाद पस्किने उद्देश्यसहित रेस्टुरेन्ट सञ्चालनमा ल्याइएको बताए ।
‘रेस्टुरेन्टमा कालिज, लोकल कुखुरा, खसी/बोकाका परिकारलगायत सर्भ गर्ने गरेका छौँ । कालिज र लोकल कुखुरा साँगास्थित आफ्नै फार्मबाट ल्याउने गरेको छु,’ उनले भने, ‘बिदाका दिन ग्राहकको बाक्लै भिड लाग्ने गर्छ, धेरैले कालिज र लोकल कुखुरासँग भात/ढिँडो खान रुचाउँछन् । हामी पूर्णतः मौलिक स्वाद पस्किने गर्छौं ।’
काठमाडौंबाट करिब २० किलोमिटर र फन भ्याली पार्कबाट पाँच सय मिटर दूरीमा रहेको यो रेस्टुरेन्ट स्टिल स्ट्रक्चर र बाँसबाट तयार गरिएको छ । दुई तलाको रेस्टुरेन्टमा एकैपटक सयजनाभन्दा बढीलाई सेवा दिन सकिने सापकोटाले बताए । रेस्टुरेन्टमा क्याम्प फायर तथा बालबालबालिका खेल्नका लागि अलग स्पेसको व्यवस्था पनि छ ।
सहरमा उकुसमुकुस भएर बसेका मानिसहरू पाहुना बनेर आउने गरेको सापकोटाको अनुभव छ । ‘अरनिको र बिपी राजमार्ग हुँदै काठमाडौं आवातजावत गर्ने धेरै यात्रु यहाँ पसेर खाना खाने गर्छन् । सुकुटे, दोलालघाटलगायत ठाउँमा बिदा मनाउन जानेहरू पनि रेस्टुरेन्ट छिर्ने गर्छन्,’ सापकोटाले भने, ‘बिहान दाउरा चुलोमा ब्रेकफास्ट खाएर सुकुटे जान्छन्, साँझ सुकुटेबाट फर्किंदा यहीँ खाना खाएर घर फर्किन्छन् ।’
