Skip This
पछिल्लो १० वर्षमा मुलुकमा आगलागीका १८ हजार सात सय ९१ घटना भएको पाइएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलका अनुसार ०७० वैशाखदेखि चैत ०७९ सम्म आगलागीबाट सात हजार ६९ जनाको ज्यान गएको छ।
२ हजार ५६८ घाइते भएका छन्। १० वर्षमा आगलागीबाट २२ अर्ब २३ करोडको क्षति भएको विवरण प्राधिकरणसँग छ। यो तथ्यांक डढेलोबाहेकको हो।
आगलागी न्यूनीकरण तथा व्यवस्थापनका लागि संरचनागत सुधार, उपकरण हस्तान्तरण, सूचना प्रणालीको विकास, प्रभावकारी सञ्चार, तहगत प्रशिक्षणसहितका पहल गरिरहेको उनले बताए।
बिहीबार प्राधिकरणमा आयोजित पत्रकार भेटघाट पोखरेलले यस वर्ष हिउँदे वर्षा असाध्यै न्यून भएकोले आगलागी तथा वन डढेलाका घटनाको जोखिम पनि अधिक हुन सक्ने बताए।
डढेलोबाट काठपात, जंगली जनावर, जडिबुटीसहित ठूलो पर्यावरणीय क्षति हुने गरेको छ। १० वर्षमा चट्याङका २ हजार २८० घटना हुँदा नौ सय एकको मृत्यु भएको छ । दुई हजार पाँच सय ४५ जना घाइते भएका छन् । यस अवधिमा दुई हजार आठ सय तीन चौपायाको पनि क्षति भएको छ।
आगलागी, वन डढेलो, चट्याङलगायत सबै प्रकारका विपद् जोखिमको जानकारी प्राप्त गरी सोहीअनुसार न्यूनीकरण तथा व्यवस्थापनका कार्य सञ्चालन गर्न सबै जानकारी एउटै पोर्टलमा व्यवस्थित गर्ने प्रणाली सुरु गरिएको छ।
आगलागी तथा वन डढेलो नियन्त्रणमा खटिने अग्नि नियन्त्रण दस्ताहरू नेपाली सेना, नेपाल प्रहरी, सशस्त्र प्रहरी बल, वन उपभोक्ता समूह र नेपाल सरकारका वन प्राविधिकका लागि उपयुक्त हुने तालिम सामग्रीहरुको विकास गरी इलर्निङ पाठ्यक्रमको डिजाइन भइरहेको प्राधिकरणका सहसचिव अनिता निरौलाले बताइन्।
इलर्निङ प्लेटफर्ममा विपद् जोखिम न्यूनीकरण र व्यवस्थापन तथा विपद जोखिम न्यूनीकरण तथा व्यवस्थापनमा लैंगिक समानता, अपांगता र सामाजिक समावेशीकरणको परिचयात्मक पाठ्यक्रम उपलब्ध भइसकेका छन्।
