- वि.सं २o७९ फाल्गुण ३० मंगलबार
काठमाडौंसहित मध्य र पश्चिम नेपालमा हावाहुरी चलेको छ ।
मौसम पूर्वानुमान महाशाखाका अनुसार काठमाडौंसहित बागमती प्रदेशका धेरै जिल्ला, गण्डकी, लुम्बिनी, कर्णाली र सुदूरपश्चिम प्रदेशका केही जिल्लामा हावाहुरी चलिरहेको छ ।
पश्चिमनेपालमा साँझ हावाहुरी चलेको थियो । काठमाडौंमा भने राति ठूलो हावाहुरी चलिरहेको छ । मोसमविद् समीर श्रेष्ठका अनुसार त्रिभुवन अन्तर्राष्ट्रिय विमानस्थल क्षेत्रमा प्रतिघन्टा ५० किलोमिटर वेगले हुरी चलेको छ ।
सामान्यतया प्रतिघन्टा २७ किलोमिटरभन्दा धेरै वेगको हावा चल्दा हावाहुरी भनिन्छ । यो अवस्थामा उडान पनि प्रभावित हुने गर्छन् ।
अहिले काठमाडौं जिल्लाको पश्चिमी क्षेत्रमा वर्षा भइरहेको छ । अन्य क्षेत्रमा पनि वर्षाको सम्भावना छ । मौसमविद् श्रेष्ठका अनुसार पश्चिमी वायुका कारण हावाहुरी चलेको हो । तर, कनेक्टिभ सिस्टम फरक छ ।
‘काठमाडौंदेखि पोखरासम्मको सिस्टम एउटै हो, त्यसभन्दा पश्चिमको सिस्टम फरक हो,’ मौसमविद् श्रेष्ठले नयाँ पत्रिकासँग भने, ‘ठूलो सिस्टम होइन, यसको आयु एक–डेढ घन्टाको मात्र रहनेछ ।’ प्रि–मनसुन भनेको हावाहुरी र चट्याङसहित वर्षाको सिजन हो ।
