त्रिकोणात्मक सिरिजको अन्तिम खेलमा स्कटल्यान्डले दिएको दुई सय १३ रनको मध्यम लक्ष्य पछ्याएको नेपालले खराब सुरुवात गरेको छ ।
नेपालले ३४ रन बनाउँदा महत्वपूर्ण तीन विकेट गुमाइसकेको छ । १५औँ ओभरको खेल चलिरहँदा नेपालले ५० रन पूरा गरेको छ । क्रिजमा कप्तान रोहित पौडेल र युवा अलराउन्डर कुशल मल्ल छन् ।
ओपनिङ ब्याटर कुशल भुर्तेल र आसिफ सेख तथा भरपर्दा ब्याटर ज्ञानेन्द्र मल्ल सस्तैमा आउट भएपछि नेपाल अप्ठेरो अवस्थामामा पुगेको छ ।
एक रनको अवस्थामा कुशल आउट भएका थिए । त्यसपछि नेपालले १८ रन जोड्दा अर्का ओपनर ब्याटर आसिफ क्याकमुलेनको बलमा क्याचआउट भए ।
ज्ञानेन्द्र भने रेफ्रीको खराब फैसलाको सिकार भए । इनसाइड एजसहितको बलमा उनी एलबिडल्बू आउट करार भए ।
त्यसअघि नेपाली बलरहरूले उत्कृष्ट प्रदर्शन गरेपछि स्कटल्यान्ड ४६.१ ओभरमा दुई सय १२ रनमा अलआउट भएको थियो ।
सन्दीप लामिछानेले चार तथा करन केसीले तीन विकेट लिएपछि स्कटल्यान्ड ५० ओभरअघि नै अलआउट भएको हो । दश ओभर बलिङ गरेका सन्दीपले ४५ रन दिएर चार विकेट लिए ।
८.१ ओभर बलिङ गरेका करनले ४२ रन दिएर तीन, ललित राजवंशीले दश ओभरमा ३३ रन दिएर एक तथा कुशल मल्लले ६ ओभरमा ६० रन दिएर एक विकेट लिए ।
सात ओभर बलिङ गरेका सोमपाल कामीले २३ रन दिए । उनले विकेट लिन सकेनन् । पाँच ओभर बलिङ गरेका दीपेन्द्रसिंह ऐरीले २९ रन दिए भने विकेट लिन सकेनन् ।
आइसिसी विश्वकप क्रिकेट लिग– २ अन्तर्गत यसअघिको खेलमा नेपालले स्कटल्यान्डलाई शानदार रूपमा हराएको थियो ।