खेलकुद डिजिटल संस्करण

मकवानपुर गोल्डकपमा मकवानपुर ११ को विजयी सुरुवात

बागमती प्रदेशको राजधानी हेटौँडामा सुरु भएको पाँचौँ संस्करणको स्थानीय तह सहिद स्मृति मकवानपुर गोल्डकप फुटबल प्रतियोगितामा मकवानपुर ११ ले विजयी सुरुवात गरेको छ ।

हेटौँडा नगरपालिका– ५ स्थित पिप्ले–क्याम्पा रंगशालामा सुरु भएको प्रतियोगिताको पहिलो खेलमा मकवानपुर ११ ले नव जनजागृति क्लब सिमरा, बारालाई हराउँदै विजयी सुरुवात गरेको हो ।

मकवानपुरले सिमरालाई २–० गोल अन्तरले हरायो । मकवानपुरको जितका लागि प्रितम स्याङ्बाे र फागुराम चौधरीले एक–एक गोल गरे । दुवै गोल पहिलो हाफमा सम्भव भएको थियो । 

स्याङ्बाेले खेलको पहिलो हाफको १२औँ र चौधरीले पहिलो हाफको अन्तिम मिनेटमा गोल गरेका हुन् ।

खेलको म्यान अफ दी म्याच मकवानपुर ११ का विदेशी खेलाडी एल्यु घोषित भए । उनले दश हजार रुपैयाँ नगदसहित ट्रफी प्राप्त गरे । 

आइतबार विभागीय टोली एपिएफ र सातदोबाटो ललितपुरबीच खेल हुनेछ ।

यसवर्ष स्थानीय टिम मकवानपुर ११ सहित सातवटा ‘ए’ डिभिजन क्लब, एउटा विदेशी टिम र तीनवटा मोफसलका टिमको सहभागिता रहेको छ । प्रतियोगिताको विजेताले १५ लाख र उपविजेताले १० लाख रुपैयाँसहित ट्रफी, मेडल र प्रमाणपत्र प्राप्त गर्नेछन् । 

प्रतियोगिताको सवोत्कृष्ट खेलाडीले बुलेट मोटरसाइकल र विधागत उत्कृष्ट खेलाडी तथा प्रशिक्षकले जनही नगद २५ हजार रुपैयाँसहित ट्रफी प्राप्त गर्ने आयोजकले जनाएको छ ।