- वि.सं २o७९ माघ ६ शुक्रबार
लामो समयपछि दीपा झा एकल गीतिसंग्रहमार्फत पुनः नेपाली सांगीतिक दुनियाँमा कमब्याक भएकी छिन् । मुम्बईको व्यस्त जीवनबाट केही दिनका लागि नेपाल आएकी गायिका झाको एकल गीतिसंग्रह ‘झिलमिल सितारा’को बिहीबार लोकार्पण गरिएको हो ।
होटेल याक एन्ड यतीमा म्युजिक नेपालद्वारा आयोजित एक कार्यक्रमबीच वरिष्ठ संगीतकार शम्भुजित बाँस्कोटा, गीतकार एसपी कोइराला, संगीतकार आलोकश्री, म्युजिक नेपालका अध्यक्ष सन्तोष शर्मा र गायिका झाले संयुक्त रूपमा गीति एल्बम सार्वजनिक गरे । प्रतिष्ठित संगीतकार आलोकश्रीद्वारा संगीतबद्ध गीति एल्बममा आठवटा गीत समावेश गरिएको छ ।
एसपी कोइराला, मुकुन्दराज शर्मा, आलोकश्री, तीर्थ श्रेष्ठ, नारायण खतिवडा, टेक तामाङ र अनिता प्रधानको शब्द रचना रहेको एल्बम ‘झिलमिल सितारा’मा दीपाले दुईवटा गीतमा श्रीमान् उदीतनारायण र एउटा गीतमा छोरा आदित्यनारायणसँग युगल स्वर दिएकी छिन् ।
