लक्षण
बालबालिकाहरू खुलेर कुरा नगर्ने, अनावश्यक रूपमा धेरै खुसी वा दुःखी हुन सक्छन् । विनाकारण रुने, बेचैन हुने, चिडचिडापन देखाउन सक्छन् । धेरै बरबराउने, घुलमिल नहुने, एकान्तमा बस्न रुचाउने हुन सक्छन् । पेट, टाउको दुख्नेजस्ता लक्षण देखिने गर्छ । उनीहरूकोे आनिबानी र व्यवहारमा अस्वाभाविक परिवर्तन देखिन थाल्छ ।
एकोहोरो हुने, जिद्दी गर्ने, खानामा मन नगर्ने वा कहिले धेरै खाने गर्न सक्छन् । त्यसैगरी, एक्कासि रिसाउने, झर्कने, पढाइमा रुचि नहुने, खेल्न, घुमफिर गर्न मन नगर्ने लक्षण देखिन सक्छन् । डिप्रेसन हुँदा बालबालिकाले ध्यान केन्द्रित गर्न नसक्ने, निद्रामा झस्किने, निष्क्रिय हुनेजस्ता लक्षण देखाउन सक्छन् ।
समाधान
यस्ता लक्षण देखिँदा अभिभावक, घरपरिवार तथा शिक्षकहरूले विशेष ख्याल पुर्याउनुपर्छ । बालबालिकासँग नजिक हुने, उनीहरूका समस्याको बारेमा कुरा गर्ने गर्नुपर्छ । उनीहरूलार्ई पर्याप्त समय दिनुपर्छ । बालबालिकाको भावना बुझ्ने, उनीहरूको भावनालाई सम्मान गर्ने तथा उनीहरूलाई भावना व्यक्त गर्ने वातावरण सिर्जना गरिदिनुपर्छ ।
बालबालिकाको रुचि र चाहनाको ख्याल गर्नुपर्छ । बालबालिमा पढाइको अनावश्यक बोझ कम गर्ने र खेल्ने तथा मनोरञ्जन गर्ने वातावरण मिलाउनुपर्छ । बालबालिकामा डिप्रेसनको समस्या देखिँदा आवश्यकताअनुसार विज्ञको मद्दतसमेत लिनुपर्ने हुन सक्छ ।